Yow pynjan i chakri kamjooh u pynsuk ya ki paidbah wa lai wa wan lyngba u sarok NH-6, ynne ka sngi ka Company Ashok Leyland da ye ko u wai ya ka Service Centre yong ka ha Phramer, West Jaiñtia Hills District ya kawa da e pyrtuid kam ka Turoi Motors Ashok Leyland Authorised Service Centre.
Ha kani ka Service Centre, ki paidbah wa pynemkaam kari Ashok Leyland ye ki u wan leh Servicing, u wan pynchna ya ki kari wa sih, wei wot ki kari wa sih cha sarok leh ye ki u Phone cha kani ka karkhana neibynta wow lai li chna chei thaw wa sih næ wow wanrah chapoh kani ka Workshop.
Ya kani ka Turoi Motors Ashok Leyland Authorised Service Centre da wan wow wai ya ka da u VDS Rymbai, Additional Superintendent of Police, West Jaiñtia Hills District hadien wa pyndep yei puræ Bible wei duwai kyrkhu kyrdoh da u M. Nongtdu uwi na ki bru waheh hei sakhilang ki paidbah wa boon wa kynthup nadooh ki bru kani ka Company, ki paidbah wa pynemkaam kari Ashok Leyland, kiwa ha-yung ha-sem u Pynskhemwanmi Kyndait uwa wanrah ya kani ka Company najrong kiwa chah khut sñiawbha.
U SN Ghosh, Regional Sale Manager hawa klam ong u ya ka Ashok Leyland da sdang ha u snem 1948 wei i lai luti ko nadooh kitai ki snem da chim ko boon ki laad ki luti wow yarap ya ki paidbah kiwa tyngkhooh yei eh, wei yow pynyaar chooh chooh i rukom chakri yow pynsuk ya ki paidbah da sdang ki leh yei rukom e yarap katkam ka juk Digital kam ka IAlert, AL Care, Leykart kiwa ye u Download na Playstore ha ki Mobile Phone.
Heijooh i por ong u wa dang kwah chooh chooh ki leh u pynkrai i chakri ha kylleiñ ki thaiñ Northeast khang wa ki paidbah wa chaniah ya kani ka jait Company u yoh yarap bha ki.
U kongsan VDS Rymbai, Additional Superintendent of Police, West Jaiñtia Hills District, hawa klam sñiawkmen u wym em man ko du kat ka Service Centre donhi tangwa da man leh ka thaw wa ye u pynbiang Spare Parts ya ki kari wa chna da ka Ashok Leyland.
Wei wym du wow pynmyntoi ko ya ki bru ka thaaiñ, tangwa kamjooh ya ki kari wa lai wa wan lyngba uni u sarok dei wym hap de ki u lai cha jngai.
Neitæ yaroh u leh yei em ki bru na ka thaaiñ wa chim u sdang dei khih yong idæ, heiwa i ye u wanrah kam kani man haroh ko ka laad wow e khih ya kiwi tawon ki khon khynroo khyllood.
Da pyn-eh-daw pyn-eh-nasib u leh ya waroh kiwa pynlai deiwa yooluti u nang ku ko neipor cheipor.
Hadien wa dep ah ya u Cake sahkynmoo yong kani ka sngi da yoh leh i rwai i chaad na ka Voice of the East, na ki bru u P. Muksor, Managing Director ka MPSS wa na ka P. Suiam wa kiwi.
Discussion about this post