Da wai ya ka yaaw Namdong kawa T. 10 Lak lyngba ka NABARD

Jowai: Ka yaaw Namgdong kawa em hapoh ka Thadlaskein C&RD Block da man ko ka yaaw wa embhah heiwa ynne ka sngi da wai ya ka yaaw wa chongdor T. 10 Lak ka poisa wa wan na ka National Bank of Agriculture and Rural Development Bank (NABADR).

U F.R. Marak uwa man leh u General Manager yong ka Meghalaya Regional Office yong ka NABARD, Shillong da ong u wa kani ka yaaw da haap ko hapoh ki kaam wa pynkreh wa tip kam ki Rural Haat.

Heiwa e kti u ya kani ka yaaw cha ki paidbah, u Marak da ong u wa kattu kiwa wan dai mar u yoh ki i yada na u slap wa ka sngi wei da kyrmen u wa ki paidbah u sumaar bha ki ya kani ka yaaw yow yoh myntoi ki hadooh ki pateiñ wow wan.

Ha kani ka yaaw da chna leh ya ka paikhana wa ka top um yow yoh ki bru u pynemkaam.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U Teidor Thangkhiew uwa man leh u District Development Manager ka NABARD, Jowai da yaroh u ya ka Managing Committee yong ka yaaw Namdong kawa da ye u pyndep u chna ya kani ka yaaw hapoh chisnem wei i kreh leh man i iwa paka.

Da e khublei u leh ya ki Engineer wa kiwa kreh ka BDO Thadlaskein kiwa ya krehlang wow pyndep ya kani ka kaam.

U Secretary yong ka Raij Namdong u I. Pakma hei klam yong oo da ong u wa nadooh wa da seiñ ya kani ka yaaw ha u snem 1953, ka yaaw ym jooh yoh yarap ko na ka Jaiñtia Hills Autonomous District Council namo na kiwa mihkhmat wow chna iyi iyi leh. Kani da man ko ka sien kawa nyngkong wa da yoh ya ka yarap khlem poi pyrkhat kawa man kam ka mana na bneiñ wei da pynsñiaw u yei sñiawngooh ya u T. Thangkhiew uwa kreh chitom wow pynyoh ya kani ka yaaw hapoh ka chnong.

Ha i klam yong ka B. Blah, BDO ka Thadlaskein da ong ko wa neiliang yong ka Block daw thooh laad ki wow pynbha chooh chooh ya kani ka yaaw kawa man kawi na ki 3 tylli ki yaaw cha kani ka thaiñ.

Kiwi kiwa klam ha kani ka sngi toh u S. Lipon, u A.Sumer, u S. Shylla Inspector Market JHADC, u Lambor Suchen, u H.H. Mohrmen, u J.Pasi wei ya ka yalang da pynlai da u Dawan S. Lyngdoh waheh Chnong Namdong B.

Ha kani ka sngi ki khynroo khylood wa ki waheh wa sian yong ka chnong da e ki ya ki chaad, ki rwai, ka tem ka put wow pynphooh ya kani ka sngi.