Ka Dorbar Chnong Pamrapaithlu ynne ka sngi da yoh ko u wai emburom ya ka yung krehkaam ka chnong ha ka yalang wa da pynlai da u Assistant Waheh Chnong, u Loving Chyrmang, heiwa neiliang yong u Solomon Dkhar, Secretary Chnong da khana parom wa tbian u yei lai luti ka chnong Pamrapaithlu hadooh wa poi ynne ka sngi wa da yoh yei yung khrehkaam wa pura.
Ya kani ka yung krehkaam da pynyoh lyngba ka MLA Scheme SWRP (2019-2020) hei dor wa T. 6 lak wei da wan wai paidbah ya ka da u MLA ka thaaiñ hi u Kyrmen Shylla uwa da pynyoh ya kani ka Scheme deiwa wan sakhi lang u MDC ka thaaiñ u Phasmon Dkhar kam u symbood kongsan.
U Kyrmen Shylla kam u kongsan hawa e yei klam da kyntu u ya kiwa yahkhmat ka chnong kamjooh kiwa chong chnong wow pynemkaam hok ki ya kani ka yung krehkaam neibynta ki kaam pynroi hapoh chnong poh thaw deiwa sdang da ka yatai ha kani ka yung dorbar.
U Phasmon Dkhar hawa e yei klam yong oo da e yaroh u ya u MLA wa da pynyoh u ya kani ka Scheme kamjooh da kyntu u leh ya kiwa kitkaam chnong u pynemkaam hok ya kani ka yung krehkaam neibynta u chakri ya ki khon ka chnong ha waroh ki liang.
Da yoh leh yei klam na u Waheh Chnong, u Leningstar Rymbai wei da wan wow sakhi lang ya kani ka sngi da u Waheh Chnong ka Pamrakmai, u Iaikiewbha Rymbai wa kiwi kiwi ki waheh chnong wa ki bru rangbah na ki chnong waphær waphær.
Da pynchongchit ya ka yalang da ka Chaad Pdiang na ka Seiñ Kynthai Pamrapaithlu.
