Ka 18 tarik uni u bnai da man ko ka sngi wow sahkynmoo ya ka Seiñ Kur Shylla Pamra Kmai, East Jaiñtia Hills heiwa da yoh ko u wai ya ka yung krehkaam wa pura yong ka.
Ya ka yalang wow wai ya kani ka yung kur da pynlai da u Lukas M Shylla, Chief Advisor yong ka Seiñ Kur Shylla Pamra Kmai wei da yoh ya ki ktien pdiang burom na ka Biantina Shylla, Advisor yong ka Seiñ Manbei Kur Shylla Pamra Kmai heiwa da yoh leh yei rwai pdiang burom wa i chaad na ka Seiñ Manbei.
Yei ktien maitphang wa i parom ka Seiñ Kur Shylla da khana da u General Secretary, u Abraham Shylla uwa da khana wa ya ka Seiñ Kur Shylla Pamra Kmai da sdang ha u snem 2009, wei yeini i thaw wa chna ya ka yung krehkaam ka kur da thied ha i dor wa duna na kawi na ki para kur ka I. Shylla.
Ha kani ka sngi, u kongsan toh u Montri ka sorkar uwa man leh u MLA ka 6-Khliehriat Constituency, u Kyrmen Shylla wa u symbood kongsan, u BDO ka Wapung C&RD Block, u Dr. Tammiyaki Shylla.
Ha kani ka sngi da pynlait paidbah leh ya ka Riti Krehkaam (Constitution) yong ka kur da u Pyrkhat Shylla, President ka Seiñ Kur Shylla Khasi Jaiñtia.
Ya ki kyntien e khublei da e da u Yet Shylla, u President ka Seiñ Kur Shylla Pamra Kmai, wei da wan sakhi lang da ki waheh nadooh u Iaikiewbha Rymbai, Waheh Chnong yong ka Pamra Kmai, ki President, ki Secretary yong ki le kur (Siangshai, Dkhar wa Rymbai) kiwa em ha ka chnong Pamra Kmai, kamjooh leh wa kiwi kiwi ki waheh wa chong chnong.
