U Montri Rangbah ka jylla, u Conrad K Sangma ynnin ka sngi da wai paidbah u ya ka yung krehkaam wa thymme ka Amlarem C&RD Block wa tip kam ka Block Integrated Development Complex, hei emlang u Montri ka chnat puræ puthi uwa man leh u MLA ka thaaiñ, u Lahkmen Rymbui deilang ki heh sorkar, kiwa yahkhmat chnong wa ki paidbah ka thaaiñ.
Ini i wan wai u Montri Rangbah man ko leh kam chibynta i lai pait lai sylli u ha Amlarem Sub-Division wei wow pait bniah ya ki kaam pynroi kiwa dang lai chakhmat wei wow yaklam leh wa ki paidbah.
Hawa klam, u Conrad da ong u wa ki Block Office man ki kam ka yingkieñ wa kongsan hapyrdi ka sorkar wa ki paidbah, kiwa e laad u pynkreh hok ya ki Scheme wa i chakri ka sorkar ha ki chnong ki thaw.
Da ong haroh u wa kani ka Office thymme u pynsuk chooh chooh ko yei rukom krehkaam wei daw pynkhlan ko i chakri cha ki paidbah wa i synchaar ka khadar.
U Montri Rangbah da e khublei u ya ki sahep ka C&RD Department hajrong i kreh chitom yong ki wei da kyntu u ya ki wow kreh dohyap ki u pynkrehaam ya ki Scheme yong ka sorkar hei rukom kawa biang tam.
Ong u leh wa i wanrah ya i tei i chna namo ki chnat krehkaam sorkar man iwa emkaam wei kongsan tam ha ki paidbah ka thaaiñ nongkyndong yow krai i roi i paar.
Neiliang u Lahkmen Rymbui, da e khublei u ya u Montri Rangbah hajrong i kitkhlieh u wow pynku ya i roi i paar ka thaaiñ, wei i wai ya kani ka Office thymme leh pynyoo i thmu ka sorkar u pynjan hi i synchaar khadar cha ki paidbah wei pynsuk yei emkaam ki paidbah hapoh ka Sub-Division.
Da emlang ha i wai ya kani ka yung krehkaam thymme ka Amlarem C&RD Block wa ki heh sorkar na ki chnat waphær kam ka Community & Rural Development Department, Public Works Department, Education Department wa ki bor District ka West Jaiñtia, kiwa yahkhmat chnong wa ki paidbah na kylleiñ ka thaaiñ.
U Block Development Officer ka Amlarem, u Dr. D. Lyngdoh da e khublei u ya u Montri Rangbah, u Montri ka chnat pure puthi wa waroh ki heh sorkar, ki paidbah wa kiwi kiwa yahkhmat wa da emlang.
Discussion about this post