Jowai: Ka Umkiang Parish ha kani ka 18 tarik da yoh ko ya ka yungmane wa thymme kawa da wan kyrkhu da u Most Rev. Victor Lyngdoh, Bishop ka Jowai Diocese wei da wai ya ka da u Most Rev. Stephan Rotlaunga CSC, Bishop ka Aizwal hei emlang u Rev Fr. Robert Mathaias, CSC, uwa man kam u Provincial Superior yong ki Holy Cross, North East Province, u Fr. Joseph Kuzhikat Parish Priest yong ka Umkiang deilang wa ki phadar na ki seiñ Holy Cross wa kiwi de ki seiñ niam wa kiwi ki Parish wa marjan.
U Most Rev. Victor Lyngdoh ha kani ka sngi da ong u wa i miatdur kani ka yungmane u miatdur chooh chooh ko lada kiwa ngaitniam u neh ki hei ngait yong ki wei u khroo chooh chooh ko lyngba i maya yong ki wa i wan chimbynta ki para wa ngait ha ka mass wa khooid.
Ha kani ka sngi da em leh kamwa 69 ngut ki khynnah kiwa yoh pdiang ya ka Communion wa nyngkong wei da em leh ka lai Procession.
Kam wow pynkynmoo ya ka Parish Umkiang da wai ya ka ha ka 22-12-2002 heiwa u Rev. Dominic Jala, Archbishop ka Shillong Diocese da wan wai u ka ha ka Mass wakhooid wa pynman ha madan yong ka chnong Umkiang.
Ha ka kynta yong wa wai emburom, u Fr. Francis Sebastian, CSC da chah thung u kam u phadar wa nyngkong kani ka Parish.
Ka yungmane ha katai ka por man ko kawa khian wei na i daw wow pynheh ya ka skur da haap tympra noh ya ka yungmane.
Kamtæ ha u snem 2009 da booh ya u moo-yurim ka yungmane kawa da sdang chwa wow chna yaka Hall cum Church Building.
Suki pa suki ka kreh ya kani ka yungmane dang lai ko cha khmat lyngba i pyllai ki phadar waphær waphær deilang wa i kyrchaan ki para wa ngait ka Parish kamjooh ki balang waphær waphær wei khaddooh da yoh wow wai ya ka.
Discussion about this post