Ka Backyard Mini RAS (Re-circulatory Aquaculture System) deilang wa ka Backyard Ornamental Fish Rearing Unit namo ka psan dakha ha kpær wei wow psan ya ki dakha wow pynriam yung da wai ha Laitkor Rngi Wahkdait wa ha Mawlai Nong Kwar ha ka 6 tarik uni u bnai da ka Director of Fisheries, ka A. L. Mawlong deiwa emlang ka Superintendent of Fisheries, East Khasi Hills Shillong, ka Hameka Papang wa kiwi de ki sahep ka chnat.
Ka Director da khana ko wa kani ka Backyard Mini RAS waka Backyard Ornamental Fish Rearing Unit toh kiwa nyngkong kawa da pynkreh wei da yarap da ka chnat Fisheries ka jylla Meghalaya hapoh ka Scheme ka sorkar pyrdi kawa tip kam kam PMMSY (Pradhan Mantri Matsya Sampoda Yojana) 2020-21. Da e khublei ko leh yei kreh chitom kiwa yoh myntoi kani ka Scheme kitæ ka Solidarity Lyngdoh kawa da booh ya ka Mini RAS wa u Paul L Pynrope deiwa booh ya ka Backyard Ornamental Fish Rearing Unit.
Da ong ko leh wa kani ka Mini RAS toh ka jait psan dakha heiwa da pynemkaam da ka jooh bait ka um hadien wa dep u pynkhooid yei jakhlia (Mechanical and Biological Filtration). Wei ya kani ye u booh pyn ha kpær wei ym emkaam thaw chiboon kamjooh ka um hawa nujor wa kiwa booh da ki nan.
Chooh chooh ini i rukom psan dakha leh da pynmih ki ki jooh hi ki dakha heiyatoh wa i bang hawa nujor wa kiwi ki rukom psan dakha, kamtæ da pynchlur ko wow sdang ya kini ha ki yung ki sem neibhah wot ki yung wa em cha sor leh ye ki wow leh yeini.
Heiyatoh wa ki dakha ki wow dai yow booh u psan ki bru kam wow pynriam yung, ka Director da ong ko wa ini toh iwa miat bha wa da em wa bien u leh neibhah ki dakha wa em cha i leh toh kiwa miat dur miat rong.
Da ban joor ko leh yei emkaam wa kini kiwa yoh myntoi wow yaklam wei wow chim yei yarap na ki bru ka chnat yow ye u man ini waroh iwa jop.
