Da wai ya u Moo-yurim ka thaw yasyllok ka SoULS wow yarap ya ki bru hapoh ka Amlarem Sub-Division

Jowai: Ka yaseiñ Samla War Sepngi District lyngba kawi naki tnat krehkaam ka Social Upliftment and Livelihood Sustainability Society (SoULS) da wai ko ya u moo-yurim yong ka Counselling Centre ha kani ka 13 Naisan ha Amlarem Civil Sub-Division, West Jaiñtia Hills District.

Ya uni u moo-yurim yong ka Counselling Centre da wan wow wai da u MLA ka thaiñ u Stephanson Mukhim hei emlang ki pastor waphær waphær, ki dkhot, kiwa mihkhmat ka Jingiaseng Samla War Sepngi District wa kiwi kiwi.

Yaka yalang ha kani ka sngi da pyllai da u Rev. N.T. Syad, da yoh i puræ naka ktien u Blai wei i duwai na u Thomson Ryngksai uwa man kam u Chairman ka Jingiaseng Samla War Sepngi.

I thmu lyngba kani ka Counselling Centre toh wow e yarap ya kitu ki khon khynroo khyllood kiwa ngat hei dih i baam waphær waphær, u yarap wow e sikai yow tip ki u jied yaka mynried mankawi wa kynthup leh ya ki khynnah puræ wow jied ki ya laad puræ, ka chongkha chongman wa kiwi kiwi.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U W.K. Lamin Chairman ka SoULS hei klam da ong u wa i angnood wow booh ya kani ka Centre toh wa kat nanglai ki sngi boon ki khon khynroo khyllood man ki wym tipsap u lai luti hei im man ka sngi neibynta ka mynried mankawi, kamwa yoo boon ki khynroo khyllood chem ki boon i eh i khoo kam hei puræ puthi, i chongkha chongman wa kiwa da ngat hei dih wa boonjait wa kiwi kiwi.

Da khana u wa daw booh leh yaki bru wa chemphang wow yasyllok khnang wa lyngba kani ka Centre u wanrah yei che yaka thaiñ War hi waroh kawi la hei stat i tip deiwa yoh ki ka yasyllok wow jied yaki liang puræ waphær waphær yow yohkhih yohkreh ki.

Da khana u leh wa da mang u chna hei lut kamwa T. 50 lak neibynta wow pynkhreh yaki karma, ki ophis, ki Library, ka Conference Room wa kiwi kiwi.

U Stephanson hei klam da pynsñiaw u i kmen ya kani ka thong kawa man kawi ka wow kyrkhu bha yaka thaiñ War liang wanang, neibhah nalor wow yarap ko ya kitu kiwa ngat hei dih i baam, sñiawsuk u leh wow sñiaw wa kam ha kini ki por wa duna i yohkreh sorkar wa lyngba ki Career Counselling u ye ki u sdang yei khih i kreh. Wei da kular u leh wow yakrehlang wa kani ka thaw.

Kiwi won wa e i klam ha kani ka sngi kynthup ki ya u H. Pohthmi MDC War West, u H. Lamin MDC War Central, u D. Toi, Sub Division Officer Amlarem wa kiwi kiwi.

Da yoh leh i rwai naka Jingiaseng Samla Balang Sohkha Presbyterian.

Wei da pynkut ya ka yalang da ki kyntien e khublei na u M. Manner, Asst. Secretary SoULS katwa i kyrkhu wai won na u Rev. J.M. Manner.