U Gavin Miguel Mylliem, u MLA ka Sohra Constituency, da wai u ya u sarok Mawkdok Khatarshnong haka yalang wa pynman daka yung krehkaam ka Public Works Department ha chnong Khrang ynnin ka sngi heiwa da emlang leh u T. G. Nengnong, Secretary ka sorkar Meghalaya, PWD (R&B), u P.S. Tynsong, BDO Laitkroh Khatarshnong C&RD Block, u Freeman Syiem, Syiem ka Hima Sohra, u N. Shabong, Rangbah Shnong Khrang, u S. Kyndiah, Superintending Engineer, PWD (R), u K.B. Makdoh, EE, PWD (R), Sohra Sub-Division, ki sahep wa ki wakreh ka chnat PWD wa kiwi kiwi de.
U Gavin M. Mylliem hei klam yong oo da pynsñiaw u yei sñiawngooh ya ki wakreh ka PWD kiwa pynyoh luti syngkieñ ya kani ka thaaiñ. Da ong u wa i pyndep chna ya uni u sarok daw pynsuk ko yei lai i wan ki bru kani ka thaaiñ wei daw pynku ko leh yei khayi pateiñ kani ka thaaiñ kiwa da yang da slem ya kani ka sngi. Da ong u leh wa ki surok toh ki budloom ka roi ka paar kawon kawon ka thaw. Ha chwa ini wai u leh ya u mooyurim u sarok ha Warwar.
U sarok na Mawkdok cha Khatarshnong toh uwi na kiwa jrong dooh hapoh ka Sohra Sub-Division wei i jrong uni u sarok nadooh Mawkdok cha Khrang toh kamwa 25 km. Uni u sarok man u leh uwi na kiwa rim dooh hapoh Meghalaya uwa da chna chwa wow yoh jylla wei da pynyabi u ya kiwa boon ki chnong kam ka Swer, Mawrah, Mawthawtieng, Kshaid, Warwar, Khrang, Kongthong, Mawshuit wa kiwi de ki chnong wa em chajan.
Kani ka thaaiñ toh kawa em boon ki warep sla tyrpad, saroo, u syiñ wa kiwi kiwi iwa daw yarap uni u sarok wow pynpoi yaki mar cha ki yaw ki haat.
I siang psiang ya uni u sarok da sdang nadooh ynnin u snem lyngba ka State Plan Fund wa RIDF tangwa nyngkong chwa ym em ye wow pyndep ya uni u sarok hadooh ha Khrang. Tangwa ha u snem 2018-19, ka Ministry of Road Transport & Highways hapoh ka Central Road Fund Scheme da pynlait poisa ko T. 365 lak yow siang psiang kamhooh yow pynchna ya i 5 Km iwa sah yong uni u sarok.
Ki sahep ka PWD da pyntip ki wa i 1.81 Km u sarok hadooh ha Kshaid wa chna hapoh ka PMGSY leh toh iwa da pyndep. Chooh chooh da pyntip ki wa i siang psiang hadooh ha Kongthong daw pyndep ha uni u Thohlakhmai (Feb).
