U Montri ka jylla wa pait yaka chnat Social Welfare, u Kyrmen Shylla da wan wai u yaka Kripa Foundation De-Addiction Centre neibynta kiwa dang khian rta kawa em ha Mawkasiang, Mawdiangdiang, New Shillong. Ya kani ka De-Addiction Centre daw pynlai daka KRIPA Foundation deiwa pynkrehkaam yaka PPP Mode waka Social Welfare Department ka sorkar Meghalaya.
Kani ka De-addiction Centre neibynta kiwa dang khian rta toh kawa nyngkong dooh ha Meghalaya wa ha North East. Lyngba kani ka Kripa Foundation De-Addiction Centre for Juveniles, i thong toh wow kynjoh ya ki khynnah wa kiwa dang khai khynroo hapoh ka imlang sahlang yow tuklar nadooh wa dang khian yow pynlait yaki nei maa, wow pyndooh ya i rukom man wa sih deiwa yoh yarap na ki bru kiwa da puræ pynbniah ha ini i kaam yow ye ki wow man kam ki dkhot ka imlang sahlang kiwa myntoi.
Hawa e yei klam kam u kongsan, u Kyrmen Shylla da ong u wa emkaam ya kiwa boon ki NGO wow kreh ki hajrong ini i kaam yow yarap ya kitu kiwa da chah kdoh chah khoom namo wow leh De-addiction hapoh ka jylla, khamtam ha ki District wym em i e yei ya syllok namo i Counseling wa i sumaar yow pynlait na ini i chitom.
Da ong u wa ini i booh yaka De-addiction Centre toh u moomær wa emkaam bha, deiwa pyntip wa ka KRIPA Foundation u ya krehlang ko waka Supercare Hospital yow leh yaka Detoxification iwa daw man wa kattu ym emkaam de wow lai cha baar ka jylla yow yoh ya ini i sumaar, wei deiwa yarap ka chnat Social Welfare Department, i e chakri ka De-addiction Centre daw man i iwa dei mynkna. Da ban joor u leh yei emkaam ya i ya krehlang ka imlang sahlang, kiwa e sikai, kiwa pait yaka aiñ wa kiwi kiwi yow ye u pynlait na ini i ktah i drugs deiwa kyrpaad leh yaki khynroo wow yait nei dih drugs wa kiwi ki jait dih pynmuaid.
Ha kani ka sngi da pynlait leh ya ki laad pynsñiawthooh paidbah hajrong ini i jooh i kaam kam ki sula, ki kot lakdop wa kiwi kiwi hapoh ka Nasha Mukt Bharat Abhiyan da u Montri.
Da pynman leh yaka e sikai namo ka Workshop hajrong i ‘Substance Abuse’ da u Fr. Joe Pereira, Founder Trustee, Kripa Foundation uwa da klam hajrong iwa emkaam wow leh yow pyndooh yei bichaar bakla ya ki bru wa chah kdoh chah khoom hei dih katwa u Dr. Chayanika Sarma, Psychiatrist and De-Addiction Expert da klam u hajrong wa kammon wow leh manda ya krehlang wa kiwa da kyrni hei dih drugs.
