Kam chibynta wow pynjan yei synchaar khadar cha ki paidbah yow suk u pynpoi ya ki Scheme yarap paidbah, ka sorkar da pteiñ ko yei wai ya ki C&RD Block wa ki Sub-Division wa thymme hapoh ka jylla.
Ynne da wai yaka Jengjal Civil Sub-Division kawa man leh ka Sub-Divison wa soo ha West Garo Hills da u Montri Rangbah ka jylla, u Conrad Sangma deiwa emlang u Montri ka chnat i Chait I Khiah, u James K. Sangma ha Baljek, iwa jngai kamwa 32 Km na Tura.
U Conrad da ong u wa kani ka Sub-Division wa thymme daw yarap ko yaka sorkar wow pnypoi smat yei yarap cha ki paidbah deiwa ong wa ka Jengal toh kawa da em hapyrdi wei ini man i leh i angnood u (L) Purno Agitok Sangma da slem yow yarap ya ki bru.
Ha kani ka sngi, u Montri Rangbah da booh u leh ya u mooyurim ka “Integrated Health Complex” ha Jengjal kawa daw chna hei lut wa T. 32 klur kawa man ka thaw e sumaar wa kyrpang.
Ha kani hi ka sngi da lehkmen leh yaka sngi ki warep ka jylla namo ka Meghalaya Farmers’ Day kawa da pynbna ha u 2019 kawa toh u leh man ka 4 tarik tangwa da leh noh yaka ynne ka sngi.
Ha kani ka sngi, u Montri Rangbah da phah u leh yaka poisa kawa T. 30 klur lyngba ka Direct Benefit Transfer (DBT) cha ki 60,000 tylli ki manyung hapoh ka Focus Plus kawa man leh kawa boon dooh ka poisa wa da phah lyngba ka DBT nadooh wa sdang ka jylla Meghalaya. Ka Focus wa Focus Plus toh ka Scheme wa saam Grant cha ki warep ka jylla.
