Ka Santa Mary Shylla, MLA Sutnga-Saipung Constituency ynnin ka sngi da wan wai ko yaka Arecanut Processing Unit yong ka Umkiang Integrated Village Cooperative Society (IVCS) wa em ha chnong Umkiang, East Jaiñtia Hills District kawa da yarap poisa da ka Meghalaya Basin Management Agency (MBMA) lyngba ka District Project Management Unit (Megha-LAMP), East Jaiñtia Hills District.
Kani ka karkhana toh yow chna boon ki jait mar na ki sla dieñ kwai kiwa sepai khlem da em wa pynemkaam.
Ka Santa da yooluti ko wa ka Umkiang IVCS u chimkhia ko wow pynkrehkaam ya kani ka karkhana wa pynmih ya kiwa boon ki jait mar na ki sla kwai deiwa chna pliang, ki khieh, ki yusong baam wa kiwi de yow man ko i kyrkhu ya waroh neibhah nachwa tip i du u baam kwai baam pathi tangwa kattu hadooh ki siang leh da ye u chna na u kwai.
Da pynchlur ko leh ya ki khynroo khyllood kiwa kwah wow seiñ khih wow chim kabu ki yaka CM-ELEVATE kawa yarap poisa hadooh 75% ya kiwa kwah u sdang da i yong ki hi i kreh.
U G Warjri, MCS, Additional Deputy Commissioner, East Jaiñtia Hills District hawa e yei klam da ong u wa ha kani ka juk katni da emkaam wow chna ya ki tiar ki tar ki wym ktah yaka rymaw kamjooh yei chait i khiah. Da ong chooh chooh u wa hanla ka sorkar ym em pynchlur ware ko wow pynboon ya ki dieñ kwai tangwa man won ko ka laad kamai yow pynyoh nong chooh chooh ya ki warep kwai deiwa chna ya ki tiar ki tar wa boon jait wa ye ki u dai.
U Arindam Dasgupta, Co-Founder, CEO yong ka Tamul Plate Marketing Private Limited, Barpeta Assam hawa e yei klam da ong u wa ki sla dieñ kwai toh kiwa sepai kiwa haap hi-eh cha madan tangwa kattu deiwa em kakni ka karkhana wei deiwa e hikai ya 5 tylli ki Arecanut Producer Group kiwa haap hapoh ka Umkiang IVCS daw chna ki ya ki pliang, ki khieh, ki siang lyngba ki sla dieñ kwai wei ya kini ki mar daw pynlai yaaw leh cha ki thaw waphær waphær wa em ha India wa cha baar ri.
Discussion about this post