Ynne ka sngi u MLA ka Jowai Constituency uwa man leh u Chairman ka Meghalaya Urban Development Authority, u Wailadmiki Shylla da wai u yaka khnap thang-bru wa tip kam ka Kambell Shullai Eco-Friendly Crematorium ha chnong Khliehtyrshi wa da chna kyrpang da ka Jowai Municipal Board (JMB) yow yoh ki khian paaid wa haap hapoh ka Puja Committee u pyndep yaka niam thang kamjooh neiliang ka Jowai Municipal Board leh yoh ko u pyndep yaki metyap wym em wa wan kamtre katkam wa yah ka juk ka por hei rukom wa khooid wa pliah wa smat i por wei deiwa lait nei sepai ki dieñ.
Ya kani ka khnap da chna haka mang poisa wa Rs. 37 lak lyngba ka 15th Finance Commission Award, 2nd Installment yong u snem 2020-2021 haka thaw wa da e sñiawbha da ka chnong Khliehtyrshi kawa em harood u sarok Bypass wa dang chna katni uwa pynyabi cha Treiiongriang.
Ha kani ka sngi da emlang u MDC ka thaaiñ, u Lakhon Dkhar, u Nominated MDC ka JHADC, u O. Lamin, ka CEO ka Jowai Municipal Board, ka D.V. Lyngdoh, u Chairman ka Jowai Municipal Board, u Philanderwell Lyngdoh, u President ka Seiñraij Jowai, u H. Toi, u Dolloi ka Elaka Jowai, u Puramon Kynjin, ki waheh chnong waphær waphær, kiwa mihkhmat ka Puja Committee wa kiwi.
Neiliang ka chnong Khliehtyrshi lyngba u waheh chnong, u Kitbok Rymbai wa u MDC ka thaaiñ uwa na kani hi ka chnong hawa klam da khana ki yei eh wa chem ki paaid wa chong chnong heipor nachwa wa dang thang da ki dieñ, kamtæ sñiawngooh ki yaka Jowai Municipal Board wa da ye ko u chna da kani ka khnap katkam ka juk stat thymme heiwa kattu da lait nei sma nei jakhlia wa i sahiar ki paidbah wa lai wa wan lyngba kani ka thaw.
U Wailadmiki Shylla hawa klam da e khublei u ya u (T) Kambell Shullai u tre wa chem yaka khnap thang-bru neibhah haka juk katni ymtoh de iwa suk u yoh ya ki dieñ lada thang kam heipor nachwa najrong wa ktah ko yei por ktah ko leh yaka rymaw.
Kamtæ dei wan kani ka Eco-Friendly Crematorium u man i myntoi ha kiwa boon ki liang. Heijooh i por ong u leh wa katwon man i sarong wa toh u bru naka thaiñ yong i uwa chem ya kani ka khnap, kamtæ kam ka Seiñraij Jowai kawa man tre ya kani ka buit toh u rah ya kani ka naam ka burom wot cha baar jylla khamtam haka ri India wa boon kiwa em haka niam wa hap pyndep metyap deiwa thang.
Discussion about this post