U Montri Rangbah ka jylla, u Conrad K Sangma, ynne da wan wai u yaka Mawrah Multi-Purpose Water Reservoir haka yalang wa da pynman ha Mawrah deiwa emlang ka Montri ka chnat i chait i khiah, ka Ampareen Lyngdoh, u Montri ka chnat PHE, u Marcuise M Marak deilang wa u MLA ka Sohra, u Gavin Mylliem.
U Conrad hawa e yei klam da ong u wa emkaam wow pynneh pynsah ya ki um ki wah wei wow chna leh ya ki thaw pynlang um wei ka sorkar u pynlut ko Rs. 400 klur ha kini ki 3 snem wow chna kam kini ki thaw pynlang um ha kylleiñ ka jylla.
Da ong u wa emkaam wow leh yeini toh neidaw wa du 4-5% ka um slap wa ye u pynneh pynsah hapoh ka jylla heiwa da kai da hiar ko cha ki jylla wa ki ri wa em chajan, wei du deiwa chna ya kam kini ki thaw pynlang um u ye u pynlang yaka um yow lait ko u sepai.
Kani ka um na kani ka Mawrah Multi-Purpose Water Reservoir daw ye u pynemkaam ya kitu kiwa psan dakha, ki warep wa kamjooh u man ko kam thaw uiñke suwari.
U Conrad da khana u leh wa u sarok wa jrong 25 Km na Sohra Main Road cha Khongtong u siang psiang hapoh ka PMGSY Scheme wei da yooluti u pyndep ha u bnai nyngkong u snem 2025 wei daw man u kam i kyrkhu khamtam ya ki kaam uiñke suwari.
Ya kani ka Mawrah Multipurpose Reservoir Project da leh sorjamin wei da sdang pynwandur ha u April 2021 ha ka mang poisa wa Rs 1.50 klur wa e yarap da ka NABARD. Hadien won da yoh yarap poisa naka State Plan deilang waka Meghalayan Age Ltd. yow chna yaka yingkieñ kjat najrong kani ka Dam, ka sarok yow poi cha kani ka thaw, ki thaw ku chong lien wa kiwi de.
Kani ka thaw pynlang um toh kawa heh hadooh 8 Hectare wei kawa yillu 10.50m ha i bynta wa yillu dooh. Ye ko leh wow pynlang 528 Million Litre ka um kawa ye u pyndap yeiwa emkaam kiwa boon ki chnong wei da ye u pyndep chna ka du ar snem donhi.
Kamwa man kattæ da psan leh ya ki dakha wa mih napoh ka jylla ha kani ka thaw.
Discussion about this post