Ka paikhana paidbah wa da chna ha madan Kiang Nangbah Stadium Jowai haka mang poisa wa Rs. 16 lak deiwa yoh yarap poisa mar chiteiñ naka Rotary Club Jowai wa naka 15th Finance Commission Award 2020-2021 yong ka Jowai Municipal Board, da wai yaka ynne ka sngi da u MLA ka Jowai, u Wailadmiki Shylla haka yalang tbian wa da emlang nadooh ki dkhot ka Rotary Club, ki dkhot ka West Jaiñtia District Sports Association kam ka tre thaw, u SP ka West Jaiñtia Hills u C. Syrti, u K. Passah, District Sport Officer West Jaiñtia uwa man leh kam u Asst. Director Sports and Youth Affairs ka sorkar jylla, kiwa chah khut sñiawbha wa kiwi.
U Wailadmiki Shylla hawa klam kam u kongsan, ong u, kani leh man kawi naka Project wa emkaam neibhah haki por wa nachwa em paikhana du cha chiliang ka madan, kamtæ i yoh u chna sa kani kawa em mar chiliang madan daw man i myntoi wa khroo yaki paidbah.
Heijooh i por ong u wa neiliang yong oo leh da pyrchang u wow kreh chitom katwa ye wa lah khamtam ha kam kani ka por wa wan ka Meghalaya Games.
“Em i por hawa yabeh ware u pyntoh pyntne yei kaam wa rap heh iwa chon bha hakhmat, jooh mylliñ leh yeiwa khian wot hawa itæ leh man i jooh hi i emkaam,” da ong u Wailadmiki, kamtæ sñiawkmen u yei em ka Rotary Club kawa man kam kawa yarap wow mih chakhmat wow yakrehlang neibynta u chna ya kani ka paikhana deiwa yooluti leh wow yoh chooh boon ki Project haki snem wow wan.
Chooh chooh ong u wow chna man iwa suk bha, iwa saja won toh i pynlai wei wow pynkhooid pynpliah. Kamtæ ngait skem u waka Rotary kamjooh ka WJDSA da em chwa ki ka Plan wa kammon u pait u yoo ya kani ka paikhana.
Chwa ini da yoh leh i klam na u Assistant Governor Zone 13 Rtn. u G. Pradeep Pillai, i klam na u Rtn. R.E.Laloo, President ka Rotary Club Jowai, u S.K. Lato, Vice President ka Rotary Club Jowai, u EMH Passah, President WJDSA, u Rtn S. Laloo, Secretary Construction Committee wa kiwi.
Ha kani ka sngi da e burom haroh ka Rotary Club yaki dkhot wa embynta u kreh chitom yow man jop kani ka kaam.
Discussion about this post