U M.B. Tongper, Additional Deputy Commissioner ka West Jaiñtia Hills District kam u kongsan, ynne ka sngi da wai u ya kawi ka yung wa tip kam ka Senior Citizen Drop-In-Centre Cum Day Care Centre, kawa man ka yung wa kyrpang wow yoh laad yachemlang ki bru wa da heh rta, yow lait ki nei sñiaw lyngngam sñiaw samen, yow yoh lok ki u yachong parom, u rkhai yakmen para wa da heh rta.
Kani ka yung em ko hajan Iawthymme haroood sarok wow lai cha Kiang Nangbah Stadium wei da pait da pynlai yaka daka Jowai City YMCA lyngba i kyrchaan poisa ka yung krehkaam yong ka District Social Welfare Officer, West Jaiñtia Hills District.
Katkam i klam yahkhmat na u Rev. G.S. Shullai, Secretary Jowai City YMCA, da khana u wa ha kani ka yung daw em leh ki bru ki wow pait kyrpang ya kiwa da heh rta wa kynthup nadooh wow thaw BP, u thaw yei khia i stiñ, u pynkmen yaki hei rukom waphær waphær, wei ye leh kiwa da heh rta u pynsñiaw yei eh i khoo yong ki.
Heiyatoh waka parom tbian wa kammon da sdang yaka YMCA wei kiyi de ki kaam wa da leh ko neibynta ka imlang sahlang ha kylleiñ ka pyrthai, da khana da u Shamir Thabah, Regional Secretary, NE Region, YMCA.
Neiliang ka R. Passah, District Social Welfare Officer hawa klam kam ka symbood kongsan, sñiawngooh ko yei em ki seiñ wa kam kini kiwa ye u yarap pynkrehkaam yaki Scheme waphær waphær ka sorkar neibynta i miat i bha wei myntoi ki paidbah waka imlang sahlang.
Ong ko wa kam kani ka yung emkaam ko neibhah wa haka juk yabeh kaam, ki tymmen chem saja ki neidaw waki khon wym em por ware de ki u pynlut waki bei ki pa.
Neiliang u kongsan won ong u wa napyrdi kiwa heh rta hapoh ka ri, boon dooh toh ki wym em kreh sorkar.
Da e nongmuna u leh wa kammon i rukom im rukom burom ya kiwa da heh rta cha ki ri sepsngi heiwa da kheiñ kyrpang bha yaki haka imlang sahlang, najrong wa boon bha leh kam kini ki jait thaw.
“Kat nang heh rta nang duna ki lok, tang haka juk stat Technology katni won dang ye bait u sñiaw yajan wa kiwi yow lait nei sñiaw lyngngam. Wei lyngba kam kini ki Centre hanla yoh u ya parom kyndeh ya rkhai hi-eh leh katwon tam da man i kmen wa khroo,” da ong u M.B.Tongper.
Chooh chooh ong u lyngba kam kini ki Centre ye u yachem ya pyrkhat ya pynsñiawlang jar jiar i chem wei iyi wa bha wa miat u rah won cha jar jiar ki yung ki sem wow parom khana haki khon ki ksu.
Discussion about this post