Jowai: Chibynta wow pynbha yei chakri yaki khynnah skur wei u yabeh yei stat katkam wa lai i por, neiliang ka St. Mary Mazzarello Girls Higher Secondary School Jowai, ynne ka sngi da wai ko yaka Website yong ka hi haka yalang wa tbian wada emlang nadooh ka R.S. Manner ADC, West Jaiñtia Hills District, ka Ida Rymbai, District Informatics Officer, National informatics Centre West Jaiñtia Hills, ki Sister kiwa sikai ka skur wa kiwi.
Ka Sr. Madona Lytep, Principal St. Mary Mazzarello HSS yooluti ko wa kani ka Website u pynmyntoi ko chiboon yaki khynnah skur neini chakhmat, khamtam hawa em kam kani ka khlam.
Lyngba kani ka Website ki khynnah skur, ki bei ki pa, daw suk ki u yoh yeiwon iwon i yutip wa pynbna ka skur deiwa lai haka Website www.stmarymazzarellojowai.in wei ye ki leh u yoh yutip heiyatoh wa ki Result, nalor wow leh yaka Registration kamjooh ka Admission.
Ka Principal ong ko wa kani dang man i sdang donhi, tangwa neipor cheipor daw rap pynbha pynmiat chooh chooh, ka wi wada pyrkhat ki u leh hadien won toh yow su bai skur Online, u pynyoh ki laad e sikai yaki khynnah skur næ ka Online Teaching Learning nalor kiwi.
Da wai leh ya kani ka Website daka R.S. Mannar ADC, West Jaiñtia, wei kam kawi na u soh yong kani ka skur pynsñiaw ko i kmen wa khroo wa ka skur wa jooh puræ ko da nangku ko chakhmat wei khamtam wa da ye u wai yaka Website yong ka hi. Yooluti ko wa kiwa sikai, kiwa yahkhmat ka skur u nangye chooh chooh ki u pynbha pyntoh pyntne ya kani ka Website neibynta u khriñ yei thij i pyrkhat ki bru heiyatoh waki laad e sikai.
Nalor wa e yaroh ko ya kiwa pynlai ka skur, yooluti ko leh wa neini chakhmat u nang ye ko u e chakri rap bha yaki bru ka District, wei lyngba kani ka Website kyntu haroh ko wow pynyoo rong ya kiyi kiyi waki khynnah skur leh ki.
“I ye u wai yaka Website man i i kyrkhu neibhah haka juk katni da yoo wa ki laad e yutip lyngba ka Internet toh kawa emkam tam wei kawa embor, da yoo wa ha kam kani ka por wa em ka khlam COVID-19 chiboon kiyi kiyi da chah pynbor wow pynemkam lyngba ki laad yutip Internet næ Information Technology heiyatoh wa i puræ puthi, i su Online, neitæ i yoh yutip naki chnat krehkaam waphær waphær, waki thaw puræ. Kamtæ lyngba i em ka Website da yarap ko chiboon yaka sorkar wa ya u paidbah,” ong ka Ida Rymbai District informatics Officer, National informatics Centre West Jaiñtia Hills.
Ha kani ka sngi da yoh leh i klam naka Sister Isabella Suja, Former Provincial of Shillong Province kawa jooh man leh ka Secretary yong ka skur, i klam na u Terence Sawian, na u Paulinus wa kiwi.
