Shillong: U Chief Secretary ka sorkar Meghalaya, u PS Thangkhiew da wai paidbah u yaka Website ka RTI haka yalang wa pynman ha Committee Room 2, Main Secretariat Building, Shillong hei emlang ka Additional Chief Secretary, ka R V Suchiang, ka R Lyngdoh, Commissioner and Secretary, u T Dkhar, DDG uwa man leh u SIO NIC, Meghalaya wa kiwi de ki sahep sorkar. Ki Deputy Commissioners da sakhi lang ki ya ini lyngba ka Video Conference deilang ki PIO wa ki Nodal Officers.
U Chief Secretary da kyntu u ya ki Deputy Commissioners wow pynemkaam ya kani ka Website yow pynjanai ya i chakri ki ya ki paidbah yow pynman yaka synchaar khadar kawa khooid.
Kani ka Website daw yarap ko leh ya kiwa yaleh RTI heiwa ki paidbah ye ki wow lai haka http://megrti.gov.in dep te Click ya ka “Online RTI” yow booh ya ki RTI yong ki. Haka bynta wa nyngkong u ye du wow e RTI ha ki PIO kiwa em hapoh ka yung krehkaam ki Deputy Commissioner wei hadien daw ye u yaleh Online RTI ha waroh ki PIO wa em hapoh ka jylla.
Da booh leh ya ki laad wow su yaka bai RTI lyngba ka Online Payment katkam ki dor wa da booh da ka aiñ RTI Act. Kani ka Website daw jubab ko leh lyngba ka Online Reply cha kiwa yaleh RTI kamjooh ya kiwa kwah u yaleh yaka First Appeal kamjooh ya ki jubab yaka.
Kiwa yaleh RTI ye ki leh wow boodien ya ki RTI wa da yaleh ki lyngba kani ka Website.
Discussion about this post