Ka Community Institute of Technology (CIT) Mowkaiaw Center ynne ka sngi da wai ko ya ka e sikai namo ka Skill Training yong ka Skills Meghalaya Project ha Mowkaiaw, West Jaiñtia Hills deiwa emlang u Barister Niang, BDO, Laskein Block kam u kongsan chirup u Lambormi Suchen uwa man leh u Skill Development Officer (SDO) yong ka Meghalaya State Skill Development Society wei da sakhi lang wa kiwa chah sikai.
Ya ka yalang da pynlai da u Dr. S. Waanbah uwa man leh u Chairman ka CIT heiwa u Lambormi Suchen da khana u hajrong i thmu yong ka Skills Meghalaya wei chaphang kiwi de ki jait e sikai wa ka sorkar da kyrchaan ko.
Neiliang u kongsan hawa e yei klam da kyntu u ya ki khynnah khynroo wow man kiwa kreh chitom wei wow seiñ kreh dei yong idæ wei wow yieñ hei kjat yong ki hi. Da kyntu u leh ya ki khynnah wa wan cha kani ka e sikai wow man kiwa minot ha ki jait kaam wa ki sñiawsuk ki deiwa ban joor leh ya ki wow man kiwa yaichah ha iwon iwon i kaam wa kreh ki. Da ong wa i yaichah daw wanrah i ya u soh i jop ha iwon iwon i liang.
Kani ka Skill Training wa da wanrah da ka Community Institute of Technology (CIT) hapoh ka Laskein Block da man ko leh ka Center kawa nyngkong hapoh ka thaaiñ wow e sikai ya ka Self Employed Tailoring wa ka Hand Embroidery neibynta ki kynthai lyngba ka Skills Meghalaya Project.
Kam chibynta wow sdang ha kani ka CIT wa em ha Mowkaiaw Center da jied 40 ngut ki khynnah kynthai wow chah sikai hei soor that (Self Employed Tailoring) wa ka Hand Embroidery.
