Hadien wa da ya pynbait wow noh biang yei jhep ha Mynkjai sa le bnai, da wanrah i yei sñiaw wow ye biang u riñ mynsien heiwa i jhep wa da smatung khamtam ha ki bynta ka Iawmusiang da dep kit wei da siat pynkhooid ki leh ya kini ki thaw.
Sa iwi i thaw wa da lang bha i jhep toh ha ka Iaw Thymme, Dongmihsngi kawa man leh ka yong ka JHADC heiwa i jhep heini i thaw da man i awjan u loom khian iwa da jan jrong kat i dukan heiwa ynne ka sngi da wan wow khat wei wow kit noh ya ini i jhep.
Neiliang ka Ri Loom Jaintia Traders Association (RJTA) lyngba u President u Paila Kordor Lyngkot da e khublei u ya ki bor sorkar nadooh ka Jowai Municipal Board, ka JHADC wa ki bor District kiwa da dep wow pynkhooid ya ki yaw ki haat ini wa dep wei ynne da wan pynkhooid sa ya ka Iaw Thymme.
Da kyrpaad leh ya ki bor wa toh wow pait ya ini kamjooh leh ya kiwa chong dai ha ki yaw ki haat wow sñiawbha ki wow ya krehlang chirup wa ka seiñ khnang wa yow ye u wanrah ya i khooid i jngiar ha ki yaw ki haat kamjooh leh ha ki chnong ki thaw.
Ka RJTA da pynkynmoo ka leh wa i khooid i jngiar toh iwa emkaam tam ha ka imlang sahlang, tangwa yow ye u wanrah næ wow ye u pyndep ya ini ym toh u chaniah du ha ka sorkar, i kamram man i i yong i kam kiwa chong chnong khamtam kiwa chong yaw chong haat kiwa im jakpoh neini toh wow em ki i bahkhlieh kammon wow man kiwa lehkhooid yow lait leh na ki kjut wa boon jait.
