Heiyatoh wa ki mukotduma PIL wa da yaleh ha Meghalaya High Court hajrong ki karkhana wa pynkrehkaam pyrchah ya ka aiñ, ini wa dep da pyntip cha ka yung bichaar wa da em uwa chah maham ha uwi na kiwa pynkrehkaam ya kini ki karkhana hapoh ka jylla.
Uwa yaleh mukotduma uwa tip kam u Shailendra Kumar Sharma da wanrah u ya ka ujor wa da booh ha Basistha Police Station, Guwahati ha ka 30-06-23 wa u Balwant Bhama uwa man uwi na ki heh wa pynkrehkaam ya ki karkhana ha Meghalaya pyrchah ya ka aiñ ha ka 30-06-23 da Phone u ya oo arsien hei step katai ka sngi wei hadien ini da wan u dei bru ha yung yow maham biang wow leh deiwa sih bha lada pteiñ u lai chakhmat waka mukotduma.
Kamtæ ha ka 6 tarik uni u bnai wa wanrah ya kani ka ujor hakhmat ka yung bichaar heiwa da khana leh cha ka yung bichaar yei pyrtuid kini kiwa pynlai ya kini ki karkhana pyrchah ya ka aiñ wei kamjooh kiwa tih mooyong pyrchah ya ka aiñ ha Meghalaya deiwa e lang yei Phone Number yong ki.
Ka sorkar hawa e jubab da ong ko wa da dep wow kem ya u Youdishthra Bhama uwa man u tre ka M/s Kalyani Fuel Limited, Shallang wei da kem ya oo ha ka 15-06-23 neidaw wym bien u ya krehlang hawa pynman ya ka takit wei katni da em u hapoh patok wei uni toh u khon yong u Balwant Bhawa uwa da maham ya uwa yaleh mukotduma.
Ka yung bichaar da ong ko wa ini da pynyoo wa uwa yaleh mukotduma ym em pynbaad wei pynmih pyrtuid kulmar u neibhah kini ki bru toh kiwa emkti wow tih mooyong pyrchah ya ka aiñ wei wow pynemkaam ya uni u mooyong ha ki karkhana yong ki.
Ka yung bichaar da ong wa man iwa sñiawsih wow yoo wa ki bor sorkar ym ye ki wow khang ya ini i tih mooyong pyrchah ya ka aiñ wot hapyrdi i pynmih hukum ka NGT waka Supreme Court wei la 15 bnai won da pynmih hukum da kani ka yung bichaar.
Sa kawi ka PIL kawa da yaleh heiyatoh wow chem tre ya u mooyong wa pynemkaam ha ki karkhana Coke wa da krehkaam pyrchah ya ka aiñ, neiliang ka High Court da ong ko wa ka sorkar hap khana ko iyi i daw wa dang ye wow chaniah ya ki bor pulit, ki bor sorkar yow dam u phah takit da ka CBI ya ini i tih mooyong pyrchah ya ka aiñ wei yei pynemkaam ha ki karkhana Coke kamjooh i chalan ya uni u mooyong cha baar ri wei da yoo lakam ki bru na Assam wa emkti wow pynlai ya ini i kaam.
Heiyatoh won wa i chah ujor uwa yaleh mukotduma uwa sah ha Assam, da phah ya u DGP ka Assam wow leh u yeiwa emkaam yow e yei yada kamjooh ya kiwa ha-yung ha-sem deilang ya ki muktiar kiwa yasaaid ya ki. Kamjooh u DGP toh u chimkhia u ya ka ujor wa da booh da uwa yaleh mukotduma.
U muktiar ka sorkar Meghalaya da pyntip u wa da dep pyntip cha ki pulit ka Assam wow kem ya kiwa emkti wow pynlai ya ki karkhana Coke wei kamjooh kiwa tih mooyong pyrchah aiñ hapoh Meghalaya.
Ya kani ka mukotduma daw chong bichaar biang ha ka 13-07-23.
