U Montri Rangbah ka jylla, u Conrad K Sangma ynne da ong u wa dadep yaklam u nadooh ynnin i sngi wa kamjooh ynne ka sngi wa u montri rangbah ka Assam, u Himanta Biswa Sarma heiyatoh wa i kajia wa da mih ynnin ka sngi ha chnong Iongkuli kawa em hapoh ka Jirang Constituency.
Da ong u wa kamwa man katni i kaam da man i iwa jaijai wei ha i yaklam wa u Himanta da chim ya i rai wow pynneh ya i chongsuk ha ka thaaiñ.
U Conrad da ong u wa hadien wa da yoh yutip u hajrong ini i jia, da phah u leh ya u MLA ka Jirang wow lai pait ya i man i long ha ini i thaw wei wow phah ya ka bui ynne i janmiet.
Heijooh i por u Conrad da kyrpaad u ya ki paidbah na waroh ar liang wow kiar ki na iwon iwon i pynyoobor khnang wow ye u pynneh pynsah ya i chongsuk.
Hawa kylli, da ong u wa ka sorkar jylla dadep jied ko ya ki kattu katni ki bynta ha khappood wow pynkhreh neibynta wow booh thaw sah ya ki pulit næ ka Out Post tangwa u Conrad da ong u wa emkaam wow man kiwa paitsiar hachwa wow chim ya kawon kawon ka rai wei ya ka rai wa khaddooh daw chim hadien i yaklam, katwa ha ki thaw wa em ya u pood wa tikna wei ym em iwon iwon i kajia næ yaknieh thaw, ka jylla daw lai bait ko chaphrang wow sdang booh noh ya ki thaw sah pulit.
Da ong u wa ha ki thaw kiwa rap mih bha i kajia, i booh ya ki thaw sah pulit daw leh i hadien wa dadep chong ya ka yalang kamjooh leh hadien wa dadep yapynbait, neibhah lada rai wow booh noh wut-wut boi ini daw wanrah i ya i kynaad wa i yaphær yumut.
