Jowai: Ki 15 ngut ki khon khynroo khyllood yong ki 4 tylli ki dorbar chnong wa kynthup ka Dulong, Panaliar, Chilliangraij wa Loomkyrwiang kiwa liwan na Bangalore/Mangalore nadooh ka 24 tarik u Naisan kiwa da pynsah ya ki ha Indoor Sports Stadium ka Seiñraij Jowai kawa man kawi na ki Quarantine Centre, ynne ka sngi da yoh ki u liwan yung hadien wada pyndep ki yei chong kset wa 28 sngi.
Ki chynrang da em ki 5 ngut katwa ki kynthai won 10 ngut, i thawsah man iwa biang jar jiar neibynta ki kynthai wa chynrang.
Ya kani ka Centre da e sñiawbha daka Seinraij Jowai lyngba u President wa u General Secretary u O.R. Challam wa u Arwotki Sumer kamjooh ka EC waroh kawi, wei da pait da pynlai won daki waheh chnong yong kitai ki 4 dorbar chnong hei yah khmat u President Synjuk Waheh Chnong ka Jowai, u Alan Niangti, chirup i krehlang ki bei ki pa yong ki khynnah.
Da ong wa waroh ki khynnah man ki kiwa chait wa khlan nadooh wa poi hadooh ynne ka sngi wa mih liwan ki. Neiliang kiwa pait wa pynlai leh dap ki dei sñiawsuk wa man ki khynroo khyllood wa em i thij i pyrkhat iwa yaar, neibhah wa ym em kwah ki u ya liwan yung du hapoh ka 15 sngi donhi, ong ki yow man iwa chngaaiñ ya waroh lang da rai ki u pynkut hadooh 28 sngi. Kamtæ kani man ko ka nongmuna wa bha tam ya kiwi neibynta u yakhun ya ka khlam COVID-19.
Ha kini ki sngi wa dep da em leh ki Medical Officer kamjooh leh ki Asha kiwa syndong wei wan sylli yei chait i khiah yong kini ki khynnah, wei wot hadooh ka Jowai Municipal Board leh wan li kit ko ya ki jhep wa mih na kani ka thaw deiwa bood katkam ki kyndon ka sorkar.
Kamtæ ynne ka sngi chwa wow mih liwan yung ki da em chwa ka yalang wa kyrpang deilang ki waheh chnong, kiwa hayung hasem yong ki khynnah wa ki Medical Team.
Ya ka yalang da pyllai da u R.Q. Laloo, da yoh i klam na u M. Laloo, u Alan Niangti kamjooh i klam neiliang ki bei ki pa wa na ki khynnah wa sah Quarantine, wei da pynkut won dei Ngooh Blai Ngooh Syiem na u khynroo Lakam Kynjin.
