Jowai: Ka Rotary Club Jowai ynne ka 8 tarik da pynthymme ko ya kiwa kitkaam wa thymme yong ka neibynta u snem 2017-2018 ha New Hill Loomsooiung Social Club Jowai ha i yalang wa tbian hajrong ka phang yong uni u snem wa ong “Rotary Making a Difference”.
Ha kani ka sngi u D.F. Majaw da chah jied u kam u President wa thymme heiwa da pynkup ya oo kam u president deilang wa kiwi tawon ki dkhot wa kitkaam da u kongsan u Rotarian Kiron Joshi (MPHF) Rotary Club of Shillong.
U President warim yong ka u J.M. Pohsngap hei klam yong oo da khana u yei lai luti ka club ha u snem wa dep hapoh i yahkhmat yong oo wei da e u leh ka bui krehkaam ka club.
U kongsan hei klam da ong u wa ka Rotary Club toh kawi naki seiñ wa heh tam ha kylleiñ ka pyrthai, da ong u leh wa da em bynta ko ha kiwa boon ki laad wow yarap yaki paidbah ha kylleiñ ka pyrthai, da jooh e yarap ko kam ha kitu wa chah ktah heibor pynjæd tympra ka rymaw wa kiwi kiwi.
Neitæ da pynsñiaw u i daw wa pynman ya oo u em bynta ha kani ka club toh wa hapoh kani ka club e ko chiboon ki laad yarap ki luti wei u yachem lok ha kylleiñ ka pyrthai, wei i daw wa kongsan toh yow chakri yaki paidbah.
Da e leh i kyrkhu ya ki dkhot wa thymme yow lai ki chaphrang yei kaam ha ki snem wow wan wei da e yumut u leh wa ym emkaam ware u pynboon ya ki dkhot du 20 ngut leh da biang lada bien ki u kreh chitom neibhah ka project ym toh em ko khah khah, neitæ da kyntu u leh wow leh yeiwon iwon wa thmu ymtoh u awri yaka poisa, chisien wada biang i rukom pynkhreh waroh man ki iwa lai bait lai ryntih.
Discussion about this post