U Rikemnlang Lamare uwa man uwi na ki 6 ngut kiwa yoh u yut na District Jail Jowai ha ka 10 tarik uni u bnai da yoh wow kem ya oo ynne na chnong ka Shiabnai, West Jaiñtia Hills da ki VDP ka Barato deiwa emlang ki dkhot ka HITO Barato Area.
Ya u Rikmenlang da yoh wow kem heipor kamwa 11:00 waje i step deiwa yahkhmat u Secretary ka VDP Barato-B uwa man leh u President ka HITO Barato Area, u Resto Sten wa deiwa ya krehlang ki VDP ka Barato-C na iwi i yung wa em ha Shiabnai ki wym tipmit ya u Rikmenlang kiwa da chah leh ya oo wow Charge Phone u.
Ya u Rikmenlang da e kti cha ki pulit kiwa wan kit ya oo wei na oo da chem leh ya ka poisa T. 4,100.
Neiliang ka VDP da e khublei ki ya u Waheh Chnong, Secretary Chnong kiwa da pyntip yow ye u lai kem ya u Rikmenlang deilang wa ki paidbah kiwa da yoo ya u Rikmenlang cha luti syngkieñ. Kamtæ da kypaad ya ki bor yong ka aiñ wa chisien wa da e kti ya oo ym toh de u poi biang u cha ka chnong wei wow pynchitom ya oo katkam ki kyndon ka aiñ sorkar.
Deiwa yoh kem ya u Rikmenlang wei ynnin ya u Ramesh Dkhar da yoh biang ya waroh kiwa da yut na Jail heiwa soo ngut toh kiwa da khlaad hadien wa chah bom ha ki paidbah hei janmiet ka 11 tarik.
U Rikmenlang katkam wa pyntip ki pulit toh uwa na ka chnong Barato wei da em u 24 snem i rta.
