Ynnin ka 15 tarik, ki bru ka Indian Navy kiwa da emlang wa ki bru ka SDRF, NDRF, SRT deiwa pynemkaam da ki kor wa ngam um (ROV) da yoo ki ya ar tylli ki metyap ha i krem mooyong wa da chlai um deiwa em 5 ngut ki bru hapoh iwa da jia nadooh 30 tarik u Naisan hadien wa pdung Dynamite.
Kamtæ ynne ka 16 tarik da hiar ki bru ngam um ka Indian Navy chapoh kani ka krem mooyong heiwa da yoh wow sai ya iwi i metyap.
Ya ini i metyap da ekti cha ki pulit ka Saipung Police Station wei da kit cha CHC Khliehriat yow pyndep ya ka Post Mortem kamjooh yow tipmit ya uwa da khlaad.
Ya iwi won i metyap daw pyrchang u sai mynstep ka sngi.
Ha kani ka krem mooyong kawa em ha i thaw wa tip kam i Krem U Le, East Jaiñtia Hills da pynemkaam da ki kor wow sai ya ka um na kani ka krem iwa da pynthut leh neidaw wa joor u slap ha kini ki sngi.
Ki bru wa sahkut hapoh kani ka krem mooyong toh:
Abdul Karim, Boko, Assam
Abdul Kalam, Barpeta, Assam
Shyamcharan Debbarma, Tripura
Anowarul Islam Barbhuiya, Assam
Abdul Sukkur, Assam
Kam wow pynkynmoo wa ki pulit da dep ki wow kem ya u tre kani ka paar mooyong katwa ya u sordar dang thooh hadooh katni.
