Ki bru ka State Disaster Response Force (SDRF) ynnin ka sngi da yoh ki wow sai yei metyap wa ar iwa da chah ban hei oor khyndaw wa da jia nadooh ka 14 tarik uni u bnai ha Rngaiñ, East Khasi Hills District. Ya uwa dang sai da tip kam u Krejunlang Khongjirem katwa yei metyap yong sa uwi da yoh wow sai ha ka 15 tarik.
Ki bru ka SDRF da em ki ha ini i thaw wa jia nadooh i miet ka 14 tarik hi hadien wa pyntip ki pulit cha ki yeiwa jia. Ha ini i jia da em leh ka kari kamai Maxi Cab wa em 9 ngut hapoh kawa da chah ngat ha ini i oor khyndaw heiwa da mynsoo malu mala kattu katni ngut wei da kit ya ki cha Pynursla PHC. Tangwa kawi won ka kari khian wa em hapoh arngut ki bru da chah rah ko cha tre synrang wa yillu bha.
Ki bru ka SDRF da ye ki wow sai nyngkong ya u Seiborlang Jaktung, uwa yah ya kani ka kari ha ka 15 tarik deiwa yarap kiwa chong chnong heipor kamwa 9:00 waje i miet heiwa da e kti yei metyap cha ki pulit.
Ki bru ka SDRF kiwa da wan toh kiwa na Mawdiangdiang wei da em ki ar tylli ki dhab (Team) wei deiwa ye u sai sa ini i metyap, da kut noh i kreh ki heini ha Rngaiñ.
