Tura : Kamwa 500 ngut ki dkhot ka ANVC, UALA kiwa da dep khylliap lama wa ki dkhot ka GNLA kiwa wan pyndem suloi da pynkhreh ya ki yow psiah biang ki cha ka imlang sahlang hadien wa pyndep ki ya ka e sikai wa 3 bnai wa tip kam ka “Skill Development Programme for Disbanded & Surrendered Cadres.”
Kam ka dak wow pdiang ya kini ki 500 ngut cha ka imlang sahlang da pynman da ka “Valedictory Programme” ha SMELC Building, Tura ynnin ka 29 tarik.
Kani ka Skill Development Programme toh kawa sdang da u Dr. Mukul Sangma, heiwa da pynkit ha kiwa boon ki heh pulit wow yah luti da kawa biang ya kini ki 500 ngut kiwa dep jied ya ka luti wa bakla. Da sikai ya ki ya kiwa boon ki jait kreh wa ye ki u sdang.
U Dr. Mukul Sangma hei klam yong oo da ong u wa kani ka e sikai man sakhiat ko kawa jop wei da slem da pyrchang u sdang ya ka tangwa da chem boon ki chitom wa khanglaad wow leh ya ka.
Da ong u leh wa em boon ki daw wa jied kiwa boon ki khynnah khynroo wow rah suloi wei emkaam u sñiawthooh bha ya kini ki daw yow lait i u jia biang neini cha khmat yow ye ka imlang sahlang u lai chaphrang ym toh cha dien.
Da yaroh u leh ya kiwa da wan pyndem wei i rai yong ki wow sdang yei imsngi yong ki deiwi tawan, neiliang ka sorkar leh daw yarap poisa ko ya ki wow seiñ khih wei da booh leh i kreh ya ki ha Nokrek, Durama Range ki wow pynman ka sorkar kam ki thaw uiñsawari.
Kani ka e sikai man ko kawa nyngkong dooh hapoh ka ri wow yarap ya ki dkhot wa kieñ suloi kiwa da wan pyndem kamjooh leh u man ko kam ka nongmuna ya kiwa ym pu em wan pyndem yow wan ki cha khmat yow imsngi biang ki ha ka imlang sahlang.
Ha kani ka sngi leh da saam ya ki Certificate cha waroh kiwa da pyndep ya kani ka esikai.
Discussion about this post