U Montri ka chnat Sports & Youth Affairs ka sorkar jylla u Banteidor Lyngdoh da pynbna paidbah wa ka Jowai daw yoh ko ya ka Futsal Ground, ka Synthetic Track waka Floodlight lyngba ka chnat yong oo khnang wa ki khon khynroo ka West Jaiñtia Hills District u ye ki wow pynpliah yei sap yong ki hapoh ka District waka jylla hi waroh kawi.
Ya ini da pynbna u hawa klam ynne ka sngi ha madan Kiang Nangbah Stadium, Jowai kawa man ka sngi sdang i lehkmen dap 50 snem ka West Jaiñtia District Sport Association (WJDSA).
Hawa yatoh waka Synthetic Track da pyntip u wa dadep wow wan thaw wan woh ha kani ka madan lyngba ka Scheme Khelo India wei da angnood u wow pynmankaam ha uni u snem chwa wow krehkaam ka Model Code of Conduct ha u 2023, neibhah wa ha kani ka madan kiwa yalehke da wan lut ki na ki dong wa ki chnong wa marjan.
Neitæ da ong u wa i thmu wow chna yaka madan yaleh Futsal deilang wa ki Floodlight toh neidaw wa sñiawthooh yeiwa emkaam ki khon khynroo wow yoh u pynwyrngia da ki yalehke waphær waphær wot ha i por janmiet khnang wow lait ki na ki kaam wa sih wa boonjait.
Ha kani ka sngi da pynbna u leh wa ka Niaw Wasa kawa na West Jaiñtia kawa jooh mihkhmat yaka jylla daw yoh noh ko yei yarap wa jooh lai kyrpaad ki na oo.
Chooh chooh da pyntip u wa ka sorkar daw sdang noh ko ha u Naitung (Apr) yaka Mission Football wa da booh ha man ki District kam ki Grassroot Centre, Advance Centre yow myntoi ki Coach kamjooh ki khynnah.
Hawa yatoh wa i dap 50 snem ka WJDSA da kyntu u ya ki wow pteiñ i yakrehlang khnang wow ye u kyntu chooh chooh yaka Association. Ha i jooh i por da kular u leh wow e yarap T. 5 lak cha kani ka Association.
Neiliang u Kyrmen Shylla, Montri ka chnat Social Welfare uwa da emlang ha kani ka sngi da e u ki kyntien kyrkhu kyrdoh ya kani ka Association wow nang ye wow kreh chooh chooh neini chakhmat.
Ha kani ka sngi da yoh i batai bniah hajrong i lai luti ka WJDSA na u Lamat-Oo Laloo, General Secretary WJDSA, wei da yoh leh i klam na u S.K. Lato, Founder Member WJDSA, wei da yoh ya ka PowerPoint Presentation na u E.M.H. Passah, Working President wa kiwi kiwi.
Da pynchongchit chooh chooh ya kani ka sngi da i chaad naka ka Dulong, ka Chaad Pastieh naka Nangbah Pohshnong, ka Mass Drill naka skur North Liberty, i rwai naka Loompyrdi Iongpiah wa kiwi kiwi.
