Khliehriat: U District Magistrate ka East Jaiñtia Hills District da pyntip paidbah u wa heiyatoh wa i poor u khñiang khlaam COVID-19 hapoh ka ri India wei wow yada yaka District kamjooh yaka jylla. Kamjooh neidaw wa em ki bru kiwa chitom kjut da iwi da sñiawthooh bakla wa em ki ya u khñiang COVID-19 iwa da pynsyir mynsien yaki bru neidaw wa boon kiwa rah ktien kamjooh ki khubor thok.
Kamtæ da khang yaki paidbah wow riñ Video wei wow chondur haki thaw sumaar kam ki Hospital, Quarantine, Isolation Centers wa haki Corona Care Centers. Heiyatoh wa ini u District Magistrate ka East Jaiñtia Hills District da pynkrehkaam u daka hukum hapoh ka Section 144 Cr.PC yow khang wow riñ yaki Mobile Video Recording wei wow chondur haki thaw wa em ki Hospital, Health Camp, Isolation Centers wa kiwi kiwi ka jait thaw wa kam kini.
Da phah leh yaki Hospital wow booh yaki Signboard wow khang pyrchah ya ini deiwa booh haki thaw psiah ki Hospital, Health Camps yow tip ki paidbah kamjooh ki wakreh ha kini ki thaw.
Kani ka hukum u krehkaam ko chisyndon wei u neh ko hadooh wa pynmih hukum da kamwi.
Discussion about this post