Kam chibynta ka World TB Day, ynne ka sngi neiliang ka yung krehkaam yong ka District Tuberculosis Officer, West Jaiñtia Hills lyngba ka National Tuberculosis Elimination Programme kawa man ka thong u pyndooh jait yaka kjut TB, da pynman yei pynsñiawthooh paidbah daka yalang wa tbian kamjooh leh ka yalehke Street Play wa da chimbynta da ki Staff Nurse ka Dr. Norman Tunnel Hospital, Jowai ha MTC Stand Iawmusiang.
Neiliang ka Dr. EBV Laloo, In-charge District Tuberculosis Officer, hawa e yei klam hajrong ka phang wa ong “Invest to End TB, Save Life”, ong ko wa waroh embynta i hajrong kani ka phang wa kynthup nadooh ki bru paidbah ki Doctor, ki Nurse, ki kynhun waphær waphær wot uwa kjut khnang yow ye u yakhun pyrchah, neibhah hawa lait u bru nei kjut TB i myntoi wym mut du ya i samen tangwa yaka imlang sahlang waroh kawi.
Kyntu haroh ko yaki bru wa em ya kani ka kjut næ ki dak ki chin wow lai mih cha ki thaw e sumaar wym toh u sarom ki wot kiwa hayung leh toh u e mynsien ki yaki khnang yow lait yabi cha kiwi tawon.
Heijooh i por toh u dih tikna leh yaki dawai khnang yow ye yakhun ya kani ka kjut.
Kam chibynta ini, ha ka leh drama da pynyoo ki wa kammon ki artylli ki manyung wa yoh ya kani ka kjut jop ki ka hadien wa da pdiang ki yei pynche pynsñiawthooh yong ka chnat i chait i khiah.
