Jowai: Ka Dorbar Chnong Dulong lyngba ka School Managing Committee ha kani ka 5 tarik u Naichiphaw da chim ko wow pynman yaka Variety Show cum Annual School Fair, heiwa da wan wow wai yaka da u Saron Paswet u Local MDC hei emlang u Krison Langstang MDC ka Bri Sumer Constituency, u waheh chnong ka Dulong u Sienwanmiki Bareh, ki paaid wa chong chnong wa kiwi kiwi.
Haka yalang wa pynlai da u Pynyoolad Kyndiah, Chairman SMC ka chnong Dulong da yoh i ngoohblai na u Yoohidame Chyrmang.
Hawa e yei klam yahkhmat, u Rimikilada Nonghulo Secretary SMC, da pynche u wa kani toh ka sien wa ar wa pynman yaka Variety Show Cum Annual School Fair hajrong ka thong wow pynyu yaka yarong poisa ka skur wa kynthup yaka Secondary Level waka Evening School kawa dang hap u kyrchan tylli tylla daka dorbar Chnong lait noh ka LP waka UP kawa da chim kti ka sorkar.
Neitæ man leh ka thong wow pynku yeisap i Talent ki khynnah, wei yow miat u bha i lai luti ki nei bynta ka mynried wa chaphrang yong ki deiwa wailad wai luti yaki rynsan waphær waphær.
Heijooh i por neiliang kiwa yahkhmat ka chnong Dulong da kyrpad ki leh na kini ki MDC wow e yarap ki yaka Dorbar Chnong khnang yow ye u kyntu kynrong yei puræ puthi wei boon leh naki khynnah skur toh kiwa dooh wa duk khamtam kiwa lai skur dei miet.
U Krison Langstang kyntu u yaki khynnah skur wow chim kabu ya kam kani ka jait rynsan wada wanrah kyrpang haki, neibhah man ko kawa ye u yarap yei lai luti wa chaphrang, wei wow pynemkaam hok leh ya jar jiar i sap wa em neibhah lada pynemkaam hok man ko ka khih ka khan yaki hi wei wym ye wow yooluti du yei khih sorkar.
U kongsan u Saron Paswet e yaroh u yaka chnong Dulong wa da ye ko u chim yaka yukit wa khia, wei yoo jngai leh yei emkaam i puræ puthi khamtam yaki khynnah wa wan naki manyung wa duk kiwa hap u lai li khih hei sngi næ chong khih cha yung ki bru dep tæ lai skur hei miet.
Da kyntu u yaki wow thooh laad haroh heitæ i rukom wym hoi ware u pynboon yaki Homework neibhah kam kini ki khynnah toh kiwa boonkam wei rap duna i por khrehkot ki. Wei kular u leh wow emlang u yakrehlang chirup chirup waka chnong la heiwon iwon i kaam.
Da pynkut yaka yalang dei klam e khublei na u Kitlang Lato General Secretary, Dorbar Chnong Dulong.
Discussion about this post