Jowai: Ka Iatreilang Village Organisation Lumpyrdi Khliehtyrshi kawa kynthup ya 40 tylli ki Self Help Group toh kawi na ka kynhun wa haap hapoh ka National Rural Livelihood Mission (NRLM) yong ka Thadlaskeiñ C&RD Block, West Jaiñtia Hills kawa da mih chakhmat wow chim ka luti u pynmih hi yaki symbe dieñ wei hei lai luti wa chisnem pura da chim yaka rai wa ha uni u snem da ye ko wow lehwarom yaka sngi pynneh pynsah rymaw deiwa pynman i thung dieñ lyngba ki symbe wa pynmih hi nalor wa da ye ko leh u dai cha kiwi won ki Village Organisation yong ka Block Thadlaskeiñ yow yoh ki u thung ynne ka sngi kyrpang yong ka bei rymaw.
U Cluster Coordinator ka NRLM u Kenny Mukhim da khana u wa nachwa wa ha kani ka sngi yaki tre dieñ da wanrah na baar tangwa kopsar neidaw wa yaphær ki thaw, i suiñbneiñ, ym jooh heh ki, kamtæ dei ya krehlang waka VO Lumpyrdi Khliehtyrshi da pyrchang ki u pynmih da ki symbe wa naka thaaiñ hi wei da sdang ha u snem 2019. Hawa sdang yaka bai nongsngi ki wakreh da e yarap lyngba ka MGNREGA, nalor wa ka Block da yarap haroh ko neibynta ka bai thied tiar.
“Hawa sdang da yoh chwa i yei esikai naka chnat Agriculture hajrong wa kammon u thung u sumaar yaki tre dieñ nalor wa e ki yei sboh waki Plastic yow thung, da yoh yarap leh naka Block heiyatoh ki bai tiar bai tar hanla hap pynlut chwa na i leh,” ong ka Chongri Rymbai, President Iatreilang Organisation.
Ong haroh ko wa hei kreh hi, i lai luti ym em suk wei da hap maad hi yei chitom neibynta u sumaar, tangwa iwa chem jynjar chem chitom dooh ki toh hei wow wanrah symbe neibhah lada lai ki cha ki khloo yong ki bru daw chah ujor ki.
Katkam ka hukum na Block hawa sdang toh u thung 8 hajar tylli ki tre dieñ tangwa kiwa im won duna ki yaka 8 hajar, hanla kattæ leh pynsñiaw ki yei sñiawkmen wa jop ka thong ki.
Hadooh ynne ka sngi da ye ki u dai hadoh 12 spah tylli cha ki VO waphær waphær wei i dor da dai 8 tyngka chi tre katkam ka hukum naka chnat Agriculture.
Neiliang u Kevin Slong, Block Project Manager NRLM Thadlaskeiñ Block e khublei u yaka Iatreilang VO wa chim ko yeini i kitkhlieh u man kawa yahkhmat pynmih symbe neibynta kiwi won ki chnong khamtam ha kam kani ka sngi wada ye u pynphooh pynpheiñ yaka ramaw deiwa thung yaki dieñ wa pynmih hi, wei yooluti u leh wa u man ko ka nongmuna ya kiwi won ki Village Organisation haki chnong waphær waphær.
