Dam ka Boxer ka Italy wow yakhun neidaw wa ka Boxer ka Algeria i bor ko kam u chynrang

Ka yalehke Boxing ki kynthai ynne ha ka Paris Olympics 2024 da wanrah ko yei chrai na kiwa boon kiwa paitke heiwa ka Imane Khelif na Algeria da jop ko ya ka Angela Carini na Italy deiwa neh ka yakura du 46 second donhi.

Ka Boxer ka Italy hadien wa chah kura ko ar sien da looid ko ya ka Helmet ko wei da noh ka ka ha khyndaw neidaw wa ong ko wym jooh em chah kura ha kawon kawon ka kynthai kawa khlanbor kam ka Boxer ka Algeria.

Ka Boxer ka Algeria toh kawa dadep chah khang wow chimbynta ha ka 2023 World Championship wa pynman da ka International Boxing Association (IBA) neidaw wym ye ko wow pynsakhiat wa ka toh ka kynthai hadien wa leh ya ka Gender Test kawa tip leh kam ka Testosterone Level heiwa lada heh ware ka Testosterone hanla kam ki toh ka kynthai leh ym chah u chimbynta ki neidaw wa da khlanbor ki kam ki chynrang.

Ha kani ka Olympics won ya kani ka Boxing da pynman da ka IOC Special Committee kawa pait donhi wa ha ka Passport toh ka kynthai, kamtæ ym em de pynman ki ya kawon kawon ka Test wei da chah wow chimbynta ka Imane Khelif.

Related posts

Super Division Saipung: Jop ka Pyrdung wa ka Mulait United

November 23, 2024

Ka Diengshynrum kam ka Champion ka 1st Division 2024 ka East Jaiñtia

November 23, 2024

Ka Boxer ka Italy ym bien ko tang wow khublei kti leh wa ka Boxer ka Algeria hadien wa pynbna wa jop ko wei da yaam joor bha ko deiwa ong ko wa ym jooh em sñiaw O wa chah bok kam itu i bor ha kawon kawon ka kynthai, deiwa pynrap chong ha ka IOC wow bichaar yeini.

Ha ka 2023 World Championship wa pynman ha Delhi, chwa wow yakhun Final ka Boxer ka Algeria, da chah Disqaulify ko ha ka IBA deilang wa ka Lin Yu-ting kawa na Taiwan neibhah hadien wa leh ya ka DNA Test da chem wa em ki ya ka XY Chromosome wei ym ye de u pdiang wa ki toh ki kynthai iwa mut da kha ya ki kam ki chynrang wei da khai khynroo ki leh kam ki chynrang tangwa ha kani ka Olympics kini waroh ar da chah wow chimbynta ki.

Ka IBA ym em yoh ko wow pynlai da ka ya kani ka Boxing ha kani ka Olympics neidaw wym em miat i yatoh ko waka IOC kamtæ da thung da ka Special Committee yow pynlai ya kani ka Boxing ki wym em pynrkhiñ ya ki kyndon.

Ini waroh da pynchrai i wot ya ka Prime Minister ka Italy kawa da ong kammon u pynyaleh da ka bru kawa man kam ki chynrang wei toh u yada yei hok ki kynthai ha kam kini ki rynsan yakob deiwa man salonsar.