I thap Vote neibynta ka chuki u Vice President da pynman ka ynne hapyrdi u kyrtong ka NDA wa yahkhmat da ka BJP, u C.P. Radhakrishnan wa u kyrtong ka INDIA Bloc wa yahkhmat ka Congress uwa jooh man leh u Supreme Court Judge, u Justice B. Sudershan Reddy.
Ha ini i jied ya u Vice President, ki le tylli ki seiñ namo ki Party da pynbna ki wym chimbynta ki.
Kini ki seiñ kynthup ki ya ka Biju Janata Dal (BJD), wa yahkhmat da u Chief Minister warim ka Odisha, u Naveen Patnaik hajrong ka yurim wow pynneh ko yei jngai na ki arliang (ka NDA wa ka INDIA Bloc). Ka BJD toh kawa em 7 ngut ki MP ha Rajya Sabha khlem em MP ha Lok Sabha.
Sa kawi won ka seiñ toh ka Bharat Rashtra Samithi (BRS) wa yahkhmat da u Chief Minister warim ka Telangana, u K. Chandrashekar Rao wei yeini da leh kam ka dak wow pyrchah yei duna i sboh Urea, iwa da ktah ya ki warep ka Telangana. Neiliang u Working President ka BRS, u K.T. Rama Rao da ong u wa hanla da maham la 20 sngi kattu, ym yoh jubab ki na ka sorkar pyrdi wa ka sorkar jylla deiwa pynrap wa lada em ka NOTA ha kani ka Election daw jied ko ya itæ. Ka BRS em ko soo ngut ki MP ha Rajya Sabha khlem em MP ha Lok Sabha.
Sa kawi won ka Party toh ka Shiromani Akali Dal (SAD) kawa da rai wow dam u thap Vote nei wym em kyrchaan ka sorkar pyrdi wa ka sorkar Punjab heiyatoh wa i chlai um. Ka Party da ong ko wa 3/4 ka Punjab toh kawa da chlai um iwa da ktah joor ya ki mar rep. Ka SAD em ko du uwi donhi u MP.
Kam wow kdaw heini wa ya i jied ya u Vice President da jied da ka Electoral College wa em 788 ngut ki dkhot kiwa kynthup ya 245 ngut na Rajya Sabha wa 543 ngut na Lok Sabha.
Katkam wa man hi, em 7 tylli ki chuki MP kiwa lait, kamtæ em ki dkhot 781 ngut heiwa 391 ngut toh ka Majority yow jop.
Ka NDA em ko 422 ngut ki dkhot, ka INDIA Bloc kam ko wa em ko 325 ngut ki MP.
Discussion about this post