Ka Election neibynta u jied thymme ya ki MDC hadooh kattæ ym pu ye wow pyntikna wa daw man ko kamwa toh u man næ daw chah pynslem ko neibhah wa hap u pynbait thymme ya ki Constituency ha ki ar tylli ki District Council kitæ ka KHADC wa JHADC.
Ya kani ka mat da yaklam leh hapoh ka dorbar tlang yong ka KHADC ha ka Motion wa da wanrah da uwa yahkhmat ka Liang Pyrchah, u Titosstarwell Chyne.
Hawa jubab neiliang u Chief Executive Member Pyniiad Sing Syiem da ong u wa hadooh katni ym pu tip lada ka Election u man ko kamwa toh u man næ ye ko u slem, tangwa i pynkhreh da la i.
Hawa yatoh wa ka Delimitation Committee, u CEM da ong u wa hadien wa da chimkti wow yahkhmat ya ka EC da yoh boon tylli ki chithi na ki chnong wow pait bniah biang yei long i man ki Constituency, wei i thung ya ka Delimitation Committee da leh katkam wa phah yong u Lat ka jylla.
Da ong wa ki Constituency da pynsñiaw ki yei emkaam wow pynbait thymme wa kynthup ya ka Mawlai, Malki-Laitumkhrah, Nongstoiñ, Rambrai, Mawshynrut neibhah wym em de ryntih i em paaid wei kamjooh i long i man ki thaw. Wei da ong u leh wa hajrong kini ki yurim wa ka Executive Committee da thoh ko cha u Lat ka jylla uwa da pynmih yei phah wow pynbait thymme wei da pynrap wa chong ha ka sorkar lyngba ka chnat District Council Affairs wow pynbna ya ka tarik Election.
Ka samoi krehkaam yong ki MDC u kut noh ko ha ka 04-03-24 wei chwa ini hap wow jied thymme ya ki MDC kamwa toh u man, tangwa i pynbait thymme da ki Delimitation Committee ya ki Constituency ha KHADC wa JHADC hadooh katni kiwa thmu wow yakhun ya ka Election toh iwa dang kulmar.
Hawa klam ha i por wa wanrah ya ka Motion, u Titos da ong u wa da em i kulmar yumut lada ka Election u man ko namo ym man ko ha u snem 2024, wei ki MDC ym ye ki wow jubab wei wot ka Executive Committee leh ym ye ko wow jubab. Da ong u wa i thung ya ka Delimitation Committee toh kawa biang, tangw toh u booh por.
Discussion about this post