Ka BJP Meghalaya da ong ko wa ymtoh u jhan ka sorkar jylla u phah pynyabi ya ki College waka Captain Williamson Sangma State University neibhah ini ye ko wow ktah hadien ha bood ya kiwa lai puræ lada ym da chong pyrkhat bha yeini.
Ka BJP da ong ko wa bha wow khut yaklam chwa wa waroh kiwa ye u chah ktah wei hadien won u chim yei rai deiwa hun wei deiwa mynjur lang da waroh.
“Ka Williamson Sangma University toh kawa dang ynnin ynne donhi katwa ka NEHU toh kawa da slem kawa da em naam kam ka Central University wei ka Certificate wa e ko toh kawa em dor ya kitu kiwa thooh kreh wei kiwa thooh thaw lai puræ, kamtæ emkaam wow pyrkhat bha chwa wow chim yeini i rai,” da ong u Mariahom Kharkrang, uwa man kam uwa e ktien ka BJP Meghalaya.
Neiliang ka JSU leh da pynsñiaw ko yei pyrchah yeiwa da ong u Montri ka chnat Puræ Puthi wow phah ya ki College wow lai pynyabi noh waka State University iwa man iwa dei pynbor khlem da chong pyrkhat bha.
Ka seiñ da ong ko wym em pyrchah ko ya kani ka State University tangwa neidaw wa man ko kawa dang sdang hiwot kamtæ daw chem chitom ko boon jait wei bha ya ka sorkar wow klam chwa ko ya ka NTA wa UGC heiyatoh wym ye u pynman ya ka CUET deiwa biang yow lait u jia biang ha ki por wow wan wei wow pynduna leh yei bai yaleh CUET hapoh ka jylla.
Ka KSU leh da pynsñiaw ko yei pyrchah yeini deiwa pynkynmoo yei yakhih yow dawa wow booh ya ka chnat krehkaam ka MBOSE ha Shillong wei ka yakhih da man ko kawa joor bha heiwa da em kiwa boon kiwa chah kem kamjooh kiwa mynsoo ha u snem 2005.
Da e daw leh wa 70% ki College ka jylla toh kiwa em cha thaaiñ mihsngi ka jylla wei ym yahaap wow pynyabi wa ka College kawa jngai na nongbah wei ka sorkar hap ko wow pynche yow lait u jia biang kam heipor ka yakhih MBOSE.
Ka sorkar hawa pynche yeini, neiliang u Commissioner & Secretary uwa man leh kam u In-charge ka Education, u Syed Md A Razi, da khana u wa da dep phah ya ka Application cha ka University Grants Commission (UGC) yow tipmit noh ya ka Captain Williamson Sangma State University.
Da khana u leh wa katkam wa phah u Montri Rangbah da pynsmat yei kreh yow ye u pynkrehkaam noh ya kani ka State University.
Kamtæ da ong u wa mar ya yoh yei tipmit, waroh ki College kiwa pynyabi waka NEHU ye ki wow pynyabi noh waka State University.
Chooh chooh da pynche wa kamwa man kattæ ki College sorkar wa ki College wa yarap da ka sorkar namo ki Government-Aided College daw hap ki wow pynyabi waka State University manda sdang ko wow krehkaam katwa ki College ki bru samen namo ki Private College chong ha ki wow rai wei ym ye wow pynbor ya ki.
I daw wa leh yeini toh yow lait u yaleh ya ka CUET ya kitu kiwa thooh thaw puræ hapoh ka jylla neibhah lada ki College tipmit ya ki da ka State University daw lait ki wow yaleh CUET.
Discussion about this post