Hadien wa sdang i yakhih wa khlem booh por ka JHTOA hajrong ki mat dawa na ki karkhana pynmih khyndaw-bilat iwa da sdang nadooh ka 6 tarik uni u bnai na Takhniang, Tuber, East Jaiñtia deiwa khang ya ki truck wa lai wa kiwa mih na ki karkhana.
Ynne ka sngi ka seiñ da sdang ko wow khang sa ya ki truck na ki karkhana ha Lumchnong khamtam kiwa mih wow lai cha Kalain wa Silchar, Assam.
Neiliang u President ka JHTOA, u Nidamon Chullet da ong u wa ynne da wan pynsangeh ya ki truck sa na Lumchnong neidaw wa chem wa em chiboon ki truck kiwa hiar cha Kalain wa Silchar (Assam) wei ini pynyoo i wa ymbien ki karkhana wow e ya i dawa ka seiñ.
Da kyntu u ya ki karkhana wow yakrehlang wa ka seiñ kamjooh leh ya ka sorkar wow chimkhia ko hajrong ini i kaam khlem theh chiliang ka pyrla yong ka.
Chooh chooh da pynche u wa hadien wa pynmih ya ka khubor ynnin wow chah du kat ya ki truck ki tre jylla (Local) wow kit khyndaw-bilat da rai noh ynne wow pynsangeh chwa ya ini i kaam neibhah wa daw mih i kulmar hajrong ini i bynta.
Da ini i phah sangeh ka JHTOA ya ki truck na ki karkhana ha ki ar tylli ki thaw (Takhniang, Tuber wa ha Lumchnong) ki karkhana khyndaw-bilat ymye de ki wow pynkit ya ki mar yong ki cha baar ka East Jaiñtia Hills District.
Kam wow pynkynmoo biang heini ya ini i yakhih da kyrchaan da kiwa boon ki seiñbhalang kam ka JSU, JYF, JSM, EJNC, KJNU wa kiwi kiwi kamjooh leh na ka North East Truck Owner Welfare Society na Guwahati, Assam.
