Shillong: U Superintendent of Police ka East Khasi Hills, u Davis N R Marak da ong u wa i rukom man ka suk ka saiñ ha Shillong da rap jai-jai i tangwa ki bor ka District ympu em pyndam ki ya ka Curfew miet neibhah dang suba wa em ki bru ki wym kwah wa ka yakhih ha Them Mator u kut ko.
Hawa klam wa ki laad pathai khubor ynnin ka sngi, u Davis da ong u, “Ka tnat da yoh yutip ko wa dang em kiwa ym pu em kwah wow kut kani ka kaam Them Mator wei dang yoo leh ya ini da ki kyntieh thoh wa mih ha ki Social Media.”
U Davis da ong u leh, “Boon na kiwa pynchong chit toh ha ki Social Media, wei i dang pait bniah bha i ya kini kiyi kiyi.”
Da ong u leh wa ka tnat pulit da pait bniah bha ki katni khamtam wa da kut ka World Cup khnang wym mih iwon iwon i thut ha ka suk ka sañ wei i pteiñ ya ka Curfew miet u man ko katkam ki sakhi ha ki por wa da lai wa i pakhot Petrol Bomb boon hi toh ha i por miet.
Heiyatoh wa i chah khut hajir ya ki kattu katni ngut ki bru, u SP da pyntip u wa wa man ko katkam ki sakhi wa da yoh lyngba ki dur wa ki Video wei i khut ya ki toh du ya kitu ki bru wa em ha ka thaw wa em i kulmar wa ki bru wa thoh ya ki ktien pynchongchit ha ki Social Media.
Da pyntip u leh wa ki pulit da phah ki palat ya 50 tylli ki chithi cha ki bru wow wan hajir cha thanat.
Discussion about this post