Ka sorkar ka ri China da pyntikna ko wa i yap ki bru na u khñiang kjut Coronavirus da kynjoh i hadooh 106 ngut wei kiwa da yoh ya uni u khñiang da ku i leh chadooh palat 4,100 ngut.
Ka sorbah Wuhan kawa uni u khñiang da sdang u wow mih wei kawa man ka sorbah wa uni u khñiang da ktah u ya kiwa boon dooh ki bru, neiliang ka sorkar ka ri China da khang ko wow psiah namo wow mih na kani ka sorbah namo da Quarantine ya kani ka sorbah.
Ka sorkar da khang lut ko ya ki sarok wa ki station rel hapoh kani ka sorbah.
Katkam ki dur wa da booh ha ki social media ki sarok kani ka sorbah kiwa jooh boon bru kamjooh ki kari da man ki kiwa thylli neibhah wa da kyntu ya waroh wow man ki kiwa chong bait hapoh yung khnang wow lait uni u khñiang u poor.
Katkam wa man katni ki ri wa da pyntikna wa em ki bru hapoh ki ri yong ki wa yoh ya uni u khñiang toh ka Thailand, Japan, South Korea, United States, Singapore, Malaysia, Vietnam, Australia, France, Germany, Nepal wa kiwi kiwi.
Neiliang ka sorkar pyrdi ka ri India lyngba ka Ministry of Health dang pynjoor ko u sylli ya i chait i khiah yong ki bru wa wan psiah chapoh ka ri ha ki Airport wa ki thaw wow psiah chapoh India ha khappood ka ri Nepal.
Discussion about this post