Da u Iatha Najiar, President JTTA.
Ka seiñ kiwa khayi ka Jaiñtia Tribal Traders’ Association (JTTA) sñiawkhia ko wow yoo wei wow chem naki por cha ki por yei rukom e Trading Licence pathar yong ka District Council wei heijooh i por leh yei e NOC yong ki Dorbar Chnong yaki dkhar lane ki Company wa heh napoh dkhar (Non-Tribal) wow wan seiñ khih hapoh sor Jowai lane hapoh ri-loom Jaiñtia hi waroh kawi.
Hei chem yong ka seiñ i em yong kini ki dkhar wa khayi kamjooh leh kini ki Company wa heh da ktah joor bha ko ya ki pli ki tre chnong kiwa khayi na kti ha ktien, neibhah wa boon hi ki yong i kiwa khayi toh kiwa chong dai ha ki dukan khian kam ka Iaw Chyiap, Iaw Tredieñ, Iaw Chor wa ha Iaw District Council (Laad Stadium).
Kwah u khana ya phi ki Dorbar Chnong khamtam kiwa em ha ki thaw pynman yaw namo ki Commercial Area, wa kini kiwa khayi kiwa man ki doh ki snam ki yong nga yong phi hap ki u maad ki eh kiwa boon, hei por lyiur chah ki yow slap yow phria yaka la-ær, hei por tlang yei kjam yei dait katwa i dai i thied na kti ha ktien.
Ha kini ki sngi wa da dep u EM In-charge Taxation yong ka JHADC da khut u yaki Dorbar Chnong kiwa em ha ki Commercial Area heiyatoh wow pyngmih poisa yaka Council naka Trading Licence, ka seiñ ong ko lada ka JHADC u im ko kam ka wow pynhun hi-eh ya ki MDC wa ki wakreh katwa ka jaitbru u yap ko, man ko kawa ym em yumut dang lah u pyndam yaka District Council.
Chooh chooh kwah haroh u ong lane u khana wa em napyrdi ki Dorbar Chnong ki wym em u burom yaka chithi ka seiñ, heiwa ka seiñ kwah ko u yachem yumut lane u ya pynap pyngsñiaw yei eh lada e NOC ki Dorbar Chnong, sñiawsih u ong tang i jubab leh ym yoh i kattu daw jan dap 2 snem.
Chwa wow pyngkut, neiliang yong ka seiñ ong ko kamni næ, lada pyrkhat phi yaka jaitbru sangeh noh u e NOC yaki dkhar (Non-Tribal) sangeh noh i e Trading Licence, lada pyrkhat won phi du kat yaka Dorbar Chnong yong phi lane yaka District Council, i tim da yang chwa ko naka pateiñ hadien.
