Jowai: Ynne ka sngi hadien wa da pynman ya ka New Hill, Jowai kam ka Containment Zone nadooh ynne i step synyaw, neiliang ki bru ka chnat i chait i khiah da lai ki cha kani ka chnong wow leh yeiwa emkaam hei emlang ki dkhot ka Dorbar Chnong.
Hawa yaklam wa u DC ka West Jaiñtia Hills, u Garod LNS Dykes da ong u wa ha New Hill ka Contact Tracing da sdang i nadooh katu ka 24 tarik wei ynne hajrong wa da leh ya ka Contact Tracing da sdang chim leh ya ki nongmuna (Sample) nadooh i step hadooh i janmiet.
Heiyatoh wa ka Contact Tracing wa i chim nongmuna ha Amlarem Sub Division, da pyntip u wa hadooh ynne ka sngi dang pteiñ kini ki kaam.
Da ong u leh wa ki Village COVID Management Committee da yarap bha ki hei wow yarap ya ka chnat ha kiwon kiwon ki bynta wa emkaam ka chnat ha kini ki sngi.
U Garod da kyntu u leh ya ki paidbah wow yakrehlang ki wa ka sorkar kam ha kini ki por deiwa bood ya ki kyndon ka sorkar wa pynmih neipor cheipor wei wow pyntip cha ki bor sorkar næ ki bor chnong lada yajan ki wa kiwa yoh COVID-19 wei wow neh ki ha yung namo u chongkset ki ha yung.
Da kyntu u leh ya ki paidbah wow dam u mih cha lait wa ki thaw paidbah ha kani ka tayaw khnang wow ye u yada nei poor uni u khñiang.
