I thut ha i lai i wan ha u sarok Jowai-Shillong dang joor i kat dang mih ki sngi wei ynne ka sngi heipor kamwa 1:27 ka wi ka Truck 12 chaka wa em u Number AS-01FC-9964 da kylla ko ha i bynta uni u sarok wa em ha Wahmynsoo, Mookyndur.
Ki paidbah wa lai wa wan na uni u sarok da khñium ki wa joor i sahkut kari ha uni u sarok wei ini da jia nei slah sih ki kari khamtam neidaw wa sih ware u sarok.
Katkam ka yutip wa da yoh na ki bor District, da ong wa kani ka Truck toh kawa kit ya ki baam mrad kam ki baam sñiang, baam syiar, baam dakha wei daw poi ka kari ha i miet ka 24 tarik wow kit salan won ya kini ki mar na kani ka Truck wa kylla.
Da pyntip leh wa ya kani ka Truck daw ye won u pynkhai hadien wa sai lut ya ki mar na ka wei daw rah ya ki kari khwe ki wow yarap pynkhai ya ka na sarok wei ini ye i wow jia hadooh i step synyaaw ka 25 tarik.
Katkam ka yutip wa yoh hadooh kattæ (07:00 waje i miet) dang em sa ka wi ka Truck kawa sih hapyrdi sarok ha Puriang.
