Hadien ynru sngi wa chah pynhiar chuki noh u MLA ka BJP na Pynthorumkhrah, ha ka sngi Bibar le ngut kiwa yahkhmat ka BJP na Delhi da lai ki wow yachem ya u Montri warim yong ka sorkar jylla, u Alexander Laloo Hek, wei ha ini i yachem wa kiwa yahkhmat ka BJP da pynsñiaw ki yei lyngngoh neibhah wa ym em i ya syllok da kiwa yahkhmat ka BJP Meghalaya hachwa wow chim ya ini i rai.
Katkam wa pyntip u Hek, kiwa yahkhmat ka BJP na Delhi wa kynthup ya u Ajay Jamwal, u Arun Singh wa u M. Chuba Ao uwa man leh kam uwa pait ya ka BJP ha Meghalaya da ong ki wa khlem yoh yutip ki iyi iyi leh hajrong i pynhiar chuki wa syndet wow ekti won cha u MLA ka South Shillong, u Sanbor Shullai.
Hawa yaklam wa u Hek, da pyntip u leh wa hadooh katni ym pu yoh yutip ya itai i leh wei ym yoh yutip hi leh naka sorkar næ naka Party wow pyndam ya oo, tangwa da yoh yutip du na ki lok wa kiwa thoh khubor.
Hawa kylli, da ong u wa ym em yaklam iyi iyi de hajrong ini i bynta wa kiwa yahkhmat ka Party ha kani ka jylla, tangwa da yaklam bait du tang wa kitai ki le ngut kiwa yahkhmat na Delhi, kiwa da chimkhia wow yaklam che ya kani ka phang wa kiwa yahkhmat ka Party.
