Shillong: U Chief Executive Member ka Khasi Hills Autonomous District Council (KHADC), u HS Shylla da ong wa i thmu ka KHAD (Khasi Social Custom of Lineage) (Second Amendment) Bill, 2018, man i i jooh bait kamwa da mynjur ha ka dorbar wei wow yieñ bait ha ka yurim Tip Kur Tip Kha.
Yeini u CEM da ong u hadien wa ka Consultative Committee wa da thung da ka Khasi Hills Autonomous District Council (KHADC) da ekti ko ya ka bui (Report) e yumut wow bichaar bniah biang ya ka KHAD (Khasi Social Custom of Lineage) (Second Amendment) Bill, 2018.
Hawa yaklam wa kiwa pathai khubor u CEM da ong u wa ka Committee dadep phah ko ynñiaw tylli ki yumut wow pynbait pynbiang ya kani ka Bill, heijooh i por da ong wa ha kini ki sngi daw khut ya ka yalang ka Executive Committee wei hadien daw rah biang ya kani ka Bill ha ka dorbar kyrpang.
U Shylla da ong u wa i leh uwa nachwa man ko kawa bha wow e jait cha ka bei wei wow em ka dustur tip Kur tip Kha, neibhah daw wai luti ko cha ka chong sang wei rap sih ko bar ya ka chongkha khleh.
Da ong u wa wot ka Science da pynsakhiat ko wa ki khon da khai na u pa katwa ka bei man ko kawa pun, wei ka chongkha khleh ha ka dustur ki Khasi ym em ko nadooh nachwa wow wanrah symbe da uwi tawon u jaitbru.
Heijooh i por ki Khasi kiwa e jait cha u pa da boon bha ki, tangwa da tyrwa u wow kyruiñ biang cha ki dustur warim deiwa pynrap wa katkam ka aiñ daw e por biang sa ynru bnai ya kiwa e jait cha u pa wow uiñ biang ki, wei ka aiñ ka KHAD (Khasi Social Custom of Lineage) Bill 1997 da kut ko ha u snem 2010 hadien wa da e por san snem wow uiñ.
Ha iwi won i liang u CEM da pyntip u wa ya ka (First Amendment Bill), 2015, da pyndam neibhah wa da booh lang ya ka rukom krehkaam u Rangbah Kur, katwa kani ka aiñ toh neibynta wow khang ya ka chongkha khleh wa ki wymtoh ki Khasi.
Da ong u wa ka KHADC daw pynkhlan chooh chooh ko ya ka (First Amendment Bill), 2015, deiwa pynkylla ya ka cha ka aiñ Kur.
Discussion about this post