U Montri Rangbah ka jylla, u Conrad Kongal Sangma da beiñ joor u yei lai thombor ki damok ha Shillong Civil Hospital ha ka 24 tarik uni u bnai, wei da khana u wa ki pulit da booddien ki wow yoh kem ya kini wei daw pynchitom katkam ka aiñ.
Hawa kylli, da ong u wa ka sorkar daw bichaar biang ko yeiwa jia hakhmat Civil Hospital yow pynman ya ki yakhih.
Kam wow kdaw heini wa ki 5 tylli ki seiñbhalang da pynman ki ya ka yalang sñiawlem wa i thang mombati hakhmat u mot yong u Kiang Nangbah hajan ka Shillong Civil Hospital, heiwa ka yalang da lai bait, tangwa hadien wa wai ka yalang da em ki kattu katni ngut ki damok kiwa da sdang yei pynkulmar wei da lai psiah ki leh chapoh yong ka Hospital wow dat ya uwi u pulit.
Hawa kylli chooh chooh wa ileh wa da e thaw hakhmat ka Hospital wow yakhih hawa kani toh u man ka thaw wa lyngngam, u Conrad da ong u wa heipor wa paan bor da ong wa toh u man ka yalang sñiawlem wa jai-jai, tangwa hadien ka yalang da mih ki bru wa chim kabu deiwa thmu wow pynkulmar.
U Montri Rangbah khlem da pynbaad ya kiwa yahkhmat ki seiñbhalang wa da pynman ya ka yalang, da ong u wa kiwa yahkhmat ki seiñbhalang ha katai ka sngi da pyrchang ki wow pynjaijai wei da kyntu ki leh ya kiwa wan cha ka yalang wym toh u pynkulmar, tangwa ki bru wa chim kabu ym em ap ki iwa da wanrah yei jia wym em sñiawsuk.
U Conrad da khana u wa ki pulit katni da leh ki yeiwa emkaam wow yoh kem ya ki bru kiwa da lai wow pynkulmar ha Civil Hospital.
