U Symbood Montri Rangbah ka jylla, u Sniawbhalang Dhar da pyntip u wa ka Regional Committee yong ka West Jaiñtia Hills dang yang ko ya ka bui (Report) na u Deputy Commissioner ka West Jaiñtia Hills heiyatoh wa ki chnong ki thaw kiwa haap hapoh yong ka thaaiñ Block-I, neibynta wow pynlai chakhmat yei pynbait pood ha ka wat wa ar waka jylla Assam.
“I da e por i ya u DC wow pynkhreh ya kawi ka Report wa i kwah i hapoh chi bnai næ ar bnai”, da ong u Sniawbhalang hawa yaklam wa ki laad pathai khubor ynnin ka sngi.
Da ong u hadien wa da pynbiang ya ka Report daw e kti noh cha ka sorkar Meghalaya wa sorkar Assam kamjooh, hadien itæ u chim yei rai kammon wow pynbait.
U Symbood Montri Rangbah uwa man leh u Chairman ka Regional Committee pynbait pood, da ong u wa em i eh neibynta wow pynbait ya ki 6 tylli ki thaw wa em hapyrdi i yakajia pood ha ka kylla wa ar.
“I pyrchang u nang pteiñ, neibhah wa kani ka phang toh kawa da neh palat ya ka 50-52 snem, tangwa ha kini ki 5 snem kiwa da lai, i da pyrchang i deiwa eh wow pynbait noh. Kani toh ka mat kawa ka sorkar booh ko hakhmat bha”, da ong u.
Da khana u wa neiliang ka jylla Assam da e ko yei ya krehlang waka Committee hajrong kani ka mat, tangwa da pdiang u leh wa ka kaam man ko kawa kylleiñ ha ki kattu katni ki bynta.
Discussion about this post