Shillong: U Montri Rangabha ka jylla, u Conrad K Sangma da ong u wa em chiboon kiwa kam heiyatoh wa ka Sweeper Colony, Them Iewmawlong iwa da wanrah yei kulmar hei wow pynbait ya kani ka thaw, heiwa da ong u wa hawa pynlang yeiwa sakhiat wa ki yutip hajrong kani ka kaam, ka sorkar da ekti ko ha ka High Level Committee (HLC) wa da khlieh da u symbood montri rangbah ka jylla, u Prestone Tynsong wow pynbait noh ya ini i eh i khoo wa dang sahteiñ.
Da ong u, “Ka High Level Committee dang sylli bniah ko ya ki kot ki sla hajrong kani ka thaw wei neitæ i daw da pynman ya ka sorjamin kawa rap bniah”.
U Conrad da pyntip u wa i sorjamin wa bniah da lai i chaaid chaaid ha i rukom wa biang, deiwa pynrap wa ympu ye u ong iwon iwon hajrong ini katwa ka HLC ympu e ko ya ka bui (Report) yong ka.
“Toh u sñiawthooh i wa em i eh i khoo ha kini ki 20 snem tam, tangwa kyrmen i wow ye u pynbiang noh yeini waroh neibhah wa katni kani ka phang man ko kawa dang sahteiñ da slem bha wei sñiaw O wa da toh i por wow pynbait noh yeini i kaam, wei ka sorkar daw bichaar bniah ko yeini wei manda yoh ya ka bui na ka HLC daw leh noh yeiwa emkaam,” da ong u Conrad.
Da ong u leh wa ka sorkar daw pyntip ko cha waroh kiwa em bynta chwa wow leh ko iwon iwon hajrong kani ka thaw.
Da pynrap u deiwa ong “Daw phyllu yumut i wa waroh ki seiñ wa ki dhab neibhah wa ka sorkar kwah ko wow ap ya waroh ki liang, tangwa ym man i iwa suk wow leh iwon iwon wow lai chakhmat katwa ka HLC ympu e ko ya ka bui yeiwa chem ko”.
Chooh chooh da ong u wa ka kaamram yong ka HLC toh wow pynlang ya ki thup waroh wa emkaam heiyatoh wow kyrriah noh ya ka Sweeper Colony na Them Iewmawlong.
Discussion about this post