U Montri wa pait ya ka chnat puræ puthi ka jylla, u Lahkmen Rymbui da ong u wa man iwa emkaam wow pyndoh noh chisien don (Permanent Solution) ya i eh kiwa sikai Samagra Shiksha Abhiyan (SSA), wei iwa emkaam toh wa kiwa sikai, ki Managing Committee wa ka sorkar toh u emlang i da iwi i yumut kammon wow leh yeiwa bha tam, khnang wa kam ini i eh ym toh de u mih de na i por cha i por.
Da ong u wa da dep wow yaklam cha Delhi wow pynlait noh yei bhah wa ar namo ka Second Instalment yong ka tulop kiwa sikai SSA wei da pyntip u wa neiliang ka sorkar jylla da dep ko wow pynbiang lut ya waroh ki kot ki sla wow yoh ya ini i bhah. Heijooh i por u Rymbui da pynsñiaw u yei sñiawngooh ya ka sorkar pyrdi wa da pynlait lut ko ya ka poisa yong ka bhah wa nyngkong, neibhah wa ka Meghalaya toh kawi na ki jylla kawa yoh nyngkong ya katai ka bhah namo ka First Instalment.
U Montri da pyntip u wa hadooh wa kut u Thohlakhmi (Feb) da em 5 bnai kiwa sikai SSA kiwa khlem yoh tulop, wei toh hajrong ini da pynman ya kiwa sikai wow yakhih deiwa pynrap wa neiliang yong ka sorkar da klam che ko wow pyrchang katwa ye u leh iyi iyi chwa ka 31 tarik uni u bnai.
U Rymnui da pynsñiaw u yei kyrmen kawa skem wa ha ki kajiak tayaw ka jylla daw yoh noh ko yei bhah wa ar (Second Instalment), wei da pyntip u wa da dep yaklam leh wa u Montri Rangbah wow pynlait ya ka tulop, ya kawa ka sorkar daw pynlait chwa ko 2 bnai. Da pyntip u wa i lut neibynta 2 bnai ka tulop kiwa sikai SSA u man ko kamwa T. 58 klur.
Hawa kylli hawa yatoh waka Corpus Fund, da pyntip u wa ha u snem 2019 ka sorkar da dep ko wow sai T. 79 klur wei ya kani ka poisa hadooh katni ym pu ye wow pynuiñ, wei na ini i daw wa ka sorkar kwah ko wow leh iyi iyi yow pyndooh yei eh waroh, heiwa da ong u leh wa kamwa man katni dang yoo jwat bha wow pynbait syndon yei eh kiwa sikai.
Hawa kylli, u Rymbui da ong wa em ki ar bynta ki rukom su, kawi deiwa su da ka sorkar pyrdi T.15,000 uwi uwa sikai, wei kawa tam daw hap su ka sorkar jylla 10%. Da pyntip u wa kawa tam na kawa su ka sorkar jylla ha kini ki 3 snem da em T.104 klur, tangwa da ong u wa lada hap wow pynuiñ noh cha ka chna muna tangka ka T.79 klur wa da dep chim daw sah noh du T.26 klur.
