Jowai: Ka seiñ kiwa yah kari sorkar watip kam ka Meghalaya Government Driver Welfare Association, Jaiñtia Hills District Jowai Branch, haka 15 tarik u Naiynru da leh burom ki yei dap 25 snem yong ka næ Silver Jubilee haka yalang wada pynman ha Conference Hall ka yungkrehkaam u DC ka West Jaiñtia Hills District.
U District Transport Officer ka West Jaiñtia Hills District, u Riki Tariang kam u kongsan ha kani ka sngi da e khublei u ya kiwa seiñ ya kani ka Association, wa hei lai luti hap wow maad boon i eh i kho, wei kamjooh leh i poi cha u moomer dap 25 snem ymtoh de kawa ke.
Da ong leh wa kam kiwa yah kari toh u em i kitkhlieh ya kiwa em hapoh kari, neibhah lada uwa yah bakla u daw jia iwa sñiawsih. Kamtæ toh u man uwa em akor tipbru tipblai wei lait na ki kaam wa sih.
Seiwi leh ong u wa i im ki bru wa lai wa wan ha sarok leh chong hei kti yong uwa yahkari, lada oo ym man u uwa em i kitkhlieh man i ma ya ki bru wa em ha sarok.
Da kyntu haroh u wa kam kiwa yahkari sorkar toh u em i bahkhlieh yaki sahep wa ki kreh ki, wei man kiwa biang por khnang wa ki kaam u man iwa lai bait.
Neitæ u man kiwa yahkari wa em akor heiwa kiwi won kiwa yahkari u bood ki yaka nongmuna yong ki, ymhoi u em i sñiawheh i sñiaw haki kat ya ki sahep wa yah kari ki.
Heijooh i por yooluti u wa kani ka seiñ u nangku ko neipor cheipor heiwa kiwa kitkaam yong ka leh u nang ye ki u kreh pyntam bar ya kiwa hachwa, nalor wow man ki kiwa yatylli wow kreh chitom yow neh i naam i burom.
Chwa ini haka yalang wa pynlai da u Riping Dkhar u President yong ka seiñ, da yoh leh i pynsñiaw yaka parom ka seiñ na u Morsha Rymbai Ex-President wa i pynsñiaw yei man i long ka seiñ na u Kloibes Dkhar, Vice President.
Neitæ da yoh i klam na u Vice President Central Body, Shillong u M.G. Lyngkhoi, i klam na u Polinstar Dkhar wei ki kyntien e khublei na u Lam Suiai Executive Member.
Discussion about this post